Tetë deputetë të rinj të Kuvendit të Shqipërisë u betuan të enjten në nisje të seancës plenare, duke zëvendësuar deputetët e dorëhequr nga mandati, për shkak të kandidimit për kryetar bashkie, në zgjedhjet vendore të 21 qershorit.
Pesë nga deputetët e rinj janë femra, duke e çuar në 31 numrin e grave në sallën e parlamentit ose në 22% të anëtarësisë së Kuvendit.
Në fillim të procedurës, në emër të Këshillit të Rregullores dhe Mandateve, deputetja Vasilika Hysi paraqiti raportin përkatës, sipas të cilit, mandati i dhënë nga KQZ për tetë deputetët e rinj është plotësisht i ligjshëm dhe në përputhje me dispozitat e kodit zgjedhor.
Më pas, deputetët e rinj, katër nga maxhoranca dhe katër nga opozita, përsëritën tekstin e betimit, sipas rregullores.
Deputetët e rinj nga maxhoranca janë: Bujar Çela i cilli mori mandatin e lënë nga kandidati për bashkinë e Fierit Armando Subashit. Mandati i deputetes Majlinda Bufi i kaloi zonjës Antoneta Shima. Me kandidimin e Artur Bushit në krye të bashkisë Krujë mandati i kaloi Shkëlqim Troplinit. Mandatin e deputetes së LSI-së Majlinda Rira e mori Edlira Çekrezit. Nga kampi i opozitës mandatin e zotit Halim Kosova e mori Asllan Dogjani, mandatin e kandidatit për bashkinë Elbasan Ardian Turku e mori Arbiola Halimi.
Mandati i deputetit Besnik Duzha i kaloi zonjës Mimoza Hajdarmatajt. Ndërsa mandatin e deputetes demokrate e cila kandidon për kryetare bashie në Shkoder Voltana Ademi, e mori ketë të enjte me vendim te kuvendit Irma Koplikut.
