E buzëqeshur dhe e mbushur me shpresë, Valmira Ruka prej më shumë se një viti po përballet me sëmundjen e rëndë të kancerit të gjirit. 42-vjeçarja nga Korça, në profesion ekonomiste, është nënë e dy fëmijëve, dhe dashuria e pazëvëndësueshme e tyre është kthyer në forcë për të luftuar përballë kësaj beteje.
“Kam një vit e gjysmë që po përballem me këtë betejë, jam e diagnostikuar me kancer të gjirit, vazhdoj me terapi dhe kimio. Unë jam nënë e dy fëmijëve të rritur. Kam një vajzë edhe një djalë”, tha ajo.
Valmira më parë gëzonte shëndet të plotë, dhe spitalet ishin të panjohura për të, ndaj përballja me kancerin pas të dyzetave ishte si një rrufe në qiell të hapur.
“Gjëja e parë kur mora vesh, as që e mendoja sepse veç kur kam lindur fëmijët kam qenë në spital. Pra kam gëzuar një shëndet të plotë. Dhe pas ekzaminimeve mora vesh që kam diçka serioze, gjëja e parë që mu kujtua dhe që më erdhi bombë ishin fëmijët e mi. Vajza, thash a do të arrij ta shoh ndoshta me vello, pastaj thashë kjo është diçka idiote”, theksoi ajo.
Të gratë e diagnostikuara me kancer gjiri, mes kalvarit të shumë sfidave duhet të përballojnë edhe atë të transformimit fizik, për shkak të terapisë. Por, rënia e flokëve nuk ishte aspak problem për Valmirën, madje duke mos e penguar aspak në aktivitetin e saj të përditshëm.
“Unë jam në profesion ekonomiste, të tillë punë bëj në një firmë ndërtimi. Mendoj se për një femër është pak e vështirë pjesa e flokëve kur vij këtu më duken shumë si unë, kur dal në rrugët e Tiranës më duket se jam e vetme… nuk e kam ndjerë kurrë pjesën e pamjes, se ne ndryshojmë në fytyrë dhe flokët. Madje edhe djali më thotë më pëlqen më shumë kështu, nuk di kur të dalin flokët a do të pëlqej më shumë atëherë apo sot”
Si një grua e hekurt që gjithmonë betejat i ka fituar, edhe kësaj radhe Valmira thotë se do ia dalë, kjo falë mbështetjes së familjes dhe miqve.
“Familja, miqtë, të gjithë kolegët apo rrethi ku unë jetoj kam pasur suport që në momentin që mësuan për problemin tim. Do t’ja dalësh patjetër më kanë thënë, këtu e gjeta forcën… I kam thënë vetes këto kohë që ty Valmira të është shtuar një aktivitet më shumë, të është shtuar spitali. Sepse e tillë je ti, e tillë jam unë. Si natyrë i fitoj betejat, shpresoj ta fitoj edhe këtë.”
“Duaje jetën, dhe mendo pozitivisht” është motoja e Valmirës, ndërsa përcjell edhe këtë mesazh:
“Ti japin vetes forcë, ta gjejmë sepse ekziston. Ta duan jetën edhe të kenë besim se do ja dalin. Nëse ne i themi vetes jam mirë, vërtetë je mirë, nëse mendojmë keq, sikur të ndjek ai trishtimi”, theksoi ajo.
