Valentina Leskaj nuk do të ketë ballafaqim kushtetues. Nuk do të ketë asnjë hetim kushtetues për akuzat e që ka ngritur ndaj saj Partia Demokratike.
Deputetja emblematike e socialistëve dhe nënkryetare e Kuvendit, ka mundur të sigurojë një fitore domethënëse me vendim gjyqësor. Kolegji i Gjykatës Kushtetuese, me firmat e tre gjykatësve, Fatos Lulo, Besnik Imeraj dhe Fatmir Hoxha, ka vendosur “…moskalimin e çështjes për shqyrtim në seancë plenare”.
Ky vendim është marrë që në 17 maj, por po bëhet publik për herë të parë në javanews.al, e cila ka mundur të sigurojë dhe një kopje të vendimit të arsyetuar.
Sipas këtij vendimi, një grup prej 22 deputetësh të PD-së kanë kërkuar mbarimin e mandatit të deputetes Leskaj me pretendimin se djali i saj, biznesmeni i njohur Arian Leskaj, ka fituar një konrtratë koncesionare në hekurudhën shqiptare, në linjat Fier-Ballsh dhe Fier-Vlorë.
Po kështu, është pretenduar se kompania në emër dhe në pronësi të të birit të nënkryetares së Kuvendit, ka përfituar fonde publike dhe nga ministria e bujqësisë.
Kjo histori ka kaluar në një kalvar të gjatë juridik, por më shumë se kaq, në një labirint të gjatë betejash politike me disa raunde. Fillimisht, Këshilli për rregulloren në Kuvendin e Shqipërisë, në 21 nëntor të vitit të kaluar e ka çuar çështjen Leskaj për votimin në seancë, por ky vendim është rrëzuar në votim. Kur u duk se gjithçka mbaroi këtu, në fakt vetëm sa kishte nisur fillimi i një kapitulli tjetër. Për këtë arsye, në 24 shkurt të këtij viti, PD insistoi sërish dhe i rikërkon Kuvendit dërgimin e çështjes në Gjykatën Kushtetuese. Vetë Leskaj një muaj më pas, depoziton në Kuvend kërkesën për gjykim të çështjes së saj, në një akt të mirëfilltë politik dhe përballje politike.
Por kolegji vërejti në vendimin e tij se gjykata ka juridiksion për rastet e vlerësimit të papajtueshmërisë me mandatin e deputetit në kushtet kur vetë deputeti kryen veprimtari fitimprurëse. Një gjë që sipas kolegjit, nuk ka ndodhur në rastin e zonjës Leskaj.
Nënkryetarja e Kuvendit Valentina Leskaj e refuzoi paraprakisht një koment të sajin për këtë vendim të Gjykatës Kushtetuese. Ajo tha se me gjasë do të fliste të mërkurën ose të enjten në seancën plenare të Kuvendit të Shqipërisë.
Pritet që në vijim e njëjta procedurë të ndiqet dhe për deputetin Ragip Suli, që ka një dosje të ngjashme në rrethana ne Gjykatën Kushtetuese.
Në fillim të kësaj jave, të hënën, Gjykata Kushtetuese publikoi vendimin e saj që i hiqte mandatin deputetit tjetër socialist Koço Kokëdhima. Kokëdhima ishte akuzuar nga PD-ja se kishte përfituar në më shumë se një rast fonde publike duke pasur mandatin e deputetit. (java / l.v)
