I ftuar në emisionin “Java në RTSH” mbrëmjen e sotme ishte shefi i qarkullimit rrugor, Erjon Ahmeti.
Në panelin me analistët Lorenc Vangjeli dhe Prec Zogaj, Ahmeti u shpreh se shkaqet e aksidenteve janë të shumta, por kryesor është fakti se qytetarët nuk zbatojnë rregullat.
Ai u shpreh se shkak tjetër i rëndësishëm është edhe pagjumësia, sidomos tek emigrantët të cilët udhëtojnë nga shteti në shtet pa pushuar.
“Ka shumë arsye, por një nga shkaqet kryesore është shkelja e rregullave nga drejtuesit. Kemi gjithashtu lagështirën por edhe pagjumësia. Kemi konstatuar një numër të madh të kësaj të fundit që jo në pak raste përfundojnë në aksidente fatale.
Nuk dua të bëj një polemikë për qarkullimin rrugor, është problem por është dytësor pasi parësor është moszbatimi i rregullave nga drejtuesit.
Nga ana tjetër, të gjithë emigrantët udhëtojnë gjatë dhe sa herë futen në Shqipëri kanë një eufori se janë në vendin e tyre. Por ata duhet të kenë kujdes e të respektojnë rregullat. Nuk mundet të udhëtosh nga shteti në shtet në atë mënyrë,”– tha shefi i qarkullimit rrugor për emisionin “Java në RTSH”.
/b.h
