Presidenti amerikan Donald Trump ka rifilluar fushatën politike duke zgjedhur si pikënisje Kaliforninë, një nga shtetet më liberale të SHBA-ve, ndërsa përgatitet për zgjedhjet afatmesme (midterm) dhe betejat politike që lidhen edhe me zgjedhjet presidenciale të vitit 2028.
Gjatë vizitës së tij të rrallë në Kaliforni, Trump sulmoi guvernatorin demokrat Gavin Newsom, një nga kritikët më të mëdhenj të administratës së tij dhe një emër i mundshëm për kandidaturën demokrate në zgjedhjet presidenciale të vitit 2028.
Përplasja mes Trump dhe Newsom është e vjetër.
Ajo u thellua disa muaj më parë, kur presidenti dërgoi Gardën Kombëtare në Los Angeles pa miratimin e autoriteteve lokale, gjatë protestave pro emigrantëve.
Në një darkë për mbledhje fondesh të Partisë Republikane në Los Angeles, Trump kritikoi politikat e Newsom për ekonominë, sigurinë dhe emigracionin. Ai e akuzoi guvernatorin demokrat se ka rritur taksat, ka lejuar abuzime me fondet publike dhe ka mbrojtur emigrantë të paligjshëm.
Nga ana tjetër, Newsom iu kundërpërgjigj duke mbrojtur politikat e Kalifornisë dhe duke theksuar se shteti ka rritur pagën minimale në 17.40 dollarë në orë, më shumë se dyfishi i pagës minimale federale prej 7.25 dollarësh.
Vizita e Trump në Kaliforni vjen në një kohë kur presidenti po përballet me vështirësi për të bindur amerikanët për politikat e tij ekonomike. Sipas një sondazhi të fundit, vetëm 31% e amerikanëve vlerësojnë pozitivisht menaxhimin e ekonomisë nga Shtëpia e Bardhë, ndërsa shumica i konsiderojnë kushtet ekonomike të vendit të dobëta.
Trump do të vijojë udhëtimin politik me një ndalesë në Las Vegas, Nevada, ku pritet të flasë sërish për ekonominë dhe uljet e taksave. Nevada konsiderohet një shtet i rëndësishëm për zgjedhjet e ardhshme, ku guvernatori republikan Joe Lombardo do të përballet me demokratin Aaron Ford.
Ndërkohë, demokratët në Nevada kanë nisur kritika ndaj vizitës së Trump, duke e lidhur administratën e tij me rritjen e kostove të jetesës dhe problemet me strehimin e përballueshëm në këtë shtet.
