Nënkryetari i komisionit të Urbanistikës në Këshillin Bashkiak të Tiranës Besnik Aliaj ka munguar këtë të enjte në seancën që do të vendosë për planin urbanistik të kryeqytetit dhe buxhetit për vitin 2017. Sipas tij plani vendor është një aferë e pastër korruptive e kryebashkiakut Veliaj dhe nëse ky plan do të miratohet, ai do të japë dorëheqjen. Por ka qenë vetë kryebashkiaku Veliaj, i cili i ka “çjerrur” maskën Aliajt duke thënë se pavarësisht se ai bën si opozitar i flaktë në deklarimet e tij, ka marrë deri më tani një projekt 500 mijë eurosh nga qeveria e majtë dhe se historia e kërcënimit është një farsë e shpikur.
“Besnik Aliaj ishte dje në dëgjesë për 3 orë dhe ishte dakord me Planin, ndërsa sot nuk vjen këtu për ta votuar. Nuk vjen dhe ua them unë arsyen, sepse askush nuk e ka kërcënuar… Nëqoftëse ka qenë katër orë në Komision dhe ndihet i sqaruar dhe ka sëkëlldi të vijë të votojë ky është problem tjetër. Nëse është sot konsulent i qeverisë dhe këtë që bën Boeri për Tiranën, 400 mijë euro e bën Besnik Aliaj për Shkodrën.
Këtej shitet si opozitar dhe këtej ha bukën e qeverisë. Ky është problem i tij. Është një njeri që sapo bëri dhe projektin e Liceut të Tiranës. Vetëm për diskutim publik në bashkinë e Vlorës është paguar 26 mijë euro, diskutime që nuk kanë ndodhur për pedonalen e Vlorës. Unë atij i them rruga e mbarë.
Ka fituar 500 mijë euro punë publike nga qeveria e drejtuar nga Rama. Bëhet aludim se ky nuk është prezent, të vijë dhe do ja them në sy. Më duket hipokrizi që pasi merr gjysëm milion euro nga taksapaguesit, pasi nuk e ke kaluar planin e Shkodrës, pasi kryetarja e bashkisë Shkodër e ka nxjerrë me shqelma nga Bashkia.
Dhe pse jeni të njëjtës parti, para interesit publik, kryetarja e bashkisë së Shkodrës nuk mund të vërë gjysëm milion euro tek Besnik Aliaj. Në mometin që hipokrizia del sheshit nuk mund të quhet kërcënim.
I vetmi urbanist që keni pasi merr gjysëm milion euro refuzon të vijë në këtë debat, atëherë do të thotë se qenka pro. Është arrivist që do dhe milionat, dhe karrierën në parti. Kam më shumë respekt për ju pavarësisht çfarë thoni, keni integritetin që nuk hani dhe bukën e qeverisë dhe vini dhe përshtyni në darkë. Nuk shkon me dy standarte.
Ligji kërkon dy, kam bërë tre nga këto dëgjesat publike me protokoll në 24 njësi. Jap dorëheqjen nëse ka bërë ky kaq në Shkodër për paratë që ka marrë.Po të sfidoj (i thotë Ollit). Aq para si keni marrë të gjithë bashkë.
Merr gjysëm milioni dhe nuk vjen, thotë më kërcënojnë.” tha Veliaj.
Plani Vendor
Duke u ndalur në Planin e Përgjithshëm Vendor, kryebashkiaku Veliaj u shpreh se ky dokument projekton Tiranën si një hapësirë europiane.
“Deri më sot Planet Urbanistike janë parë, me të drejtë, si plane zhvillimi, që përcaktojnë njolla e intensitete ndërtimi. Por kjo nuk ka lidhje me dokumentin që kemi sjellë sot përpara Këshillit. Sigurisht, që edhe ky Plan adreson çështjen e ndërtimit, por kjo është veç njëra nga tematikat e trajtuara aty dhe jo më e rëndësishmja. Sepse mbi të gjitha ky dokument është një inventar i të gjithë problemeve, potencialeve, aseteve të Tiranës dhe i rrugëve sesi këto mund të adresohen apo shfrytëzohen në të mirë të qytetit”, tha ai.
Kryebashkiaku deklaroi se procesi i hartimit të këtij plani ka vendosur pa asnjë dyshim një standard të ri transparence dhe përfshirje të komunitetit.
“Plani që sjellim sot synon t’i japë Tiranës një identitet të ri urbanistik. Nuk është një plan i ngrirë, mekanik, i bukur në letër por i pazbatueshëm në praktikë, por një dokument që e trajton hapësirën e Tiranës së madhe si një organizëm, fleksibël dhe pragmatik sepse fokusohet tek zgjidhjet praktike në të mirë të qytetarëve dhe jo tek vizatimet e bukura në hartë tha Veliaj duke theksuar se plani i ri ka 5 shtylla kryesore:
Së pari, plani e trajton densitetin e qytetit në funksion të rritjes së efikasitetit të infrastrukturës, diversitetit të shërbimeve dhe ndryshimit të qasjes ndaj lëvizshmërisë;
Së dyti, ndryshimi i qasjes ndaj mobilitetit dhe lëvizshmërisë së njerëzve dhe mallrave në qytet
Së treti, rizhvillimi dhe rigjenerimi i qytetit;
Së katërti, ruajtja e territorit bujqësor dhe natyror dhe Pylli Orbital si një kufi i ndërtimit pa kriter;
Së pesti, zhvillimi ekonomik, turistik dhe bujqësor i periferisë;
