Kreu i Unionit të ish-të përndjekurve politikë, Besim Ndregjoni thotë se thirrjen për të shkatërruar bunkerin tek Ministria e Brendshme e bënë edhe deputetë të Partisë Demokratike. “Edhe deputetët bënë thirrje për bunkerin”, -u shpreh ai.
I ftuar në studion e Report TV, Ndregjoni, i cili është nën akuzën e policisë për thirrje që nxisin dhunën, thotë se bunkerin nuk e dogjën ish-të përdjekurit, por populli dhe se Rama sipas tij, duhet të kërkojë falje për ndërtimin e këtij bunkeri.
Pas fjalës përmbyllëse të liderit të opozitës Lulzim Basha në podiumin pranë kryeministrisë në protestën e 8 dhjetorit, thirrja e Besim Ndregjonit ishte e fundit që u dëgjua: Të shkojmë të djegim bunkerin e Edi Ramës.
Kryedemokrati Basha dhe lideri historik i së djathtës Sali Berisha u panë në mesin e turmës të zhvendosur nga kryeministria drejt Ministrisë së Brendshme, duke ndjekur qetësisht për disa çaste shkatërrimin e bunkerit nga protestuesit. Ndërkohë në një konferencë për mediat një ditë pas protestës, Basha i shprehu mirënjohje “heronjve që e kallën në flakë simbolin e diktaturës”.
Pjese nga biseda ne studio
Ndregjoni: Ish-të përndjekurit politikë kanë një vit rresht që bëjnë thirrje që bunkeri të shkulet. Ka 25 vjet që të përndjekurit luftojnë për të mos u rikthyer simbolet e diktaturës. Zoti Basha dhe zoti Berisha ishin organizues të protestës, unë isha i ftuar në atë protestë. Çdo protestë ka skenarin e vet, skenarin e protestës, pastaj se si e përdor politika skenarin është tjetër gjë. Oficeri më tha jeni i akuzuar se keni bërë thirrje për dhunë. Më fal i thash: hapi kërkesat që të kam sjellë në komisariat, kam thënë: Sot do të protestojmë të shkulim bunkerin, simbolin e diktaturës.
Gazetari: Ishte edhe para ministrisë deklarata për të protestuar?
Ndregjoni: Po si nuk ishte, edhe deputetët bënë thirrje për bunkerin
Shikoni kronikat, të gjithë ata që mbajtën fjalë, ishin kundër simboleve të diktaturës, kundër dekorimeve të krimineleve. Pra nuk ishte kjo një thirrje që u përdor për të dhunuar. Do të ishte thirrje për dhunë nëse protestuesit veç bunkerit do t’i kishin vënë flakën makinave, institucioneve, se jemi mësuar t’i shohim këto 25 vjet. Por jo protestuesit ishin shumë në rregull, ai bunker duhet hequr.
Kryeministri Edi Rama duhet ta dënojë vendosjen e bunkerit dhe t’i kërkojë falje ish-të përndjekurve. PD nuk është për rikthimin e simboleve të komunizmit, nëse nuk është kundër, unë nuk shkoj fare në miting. Djegia ishte një revoltë kombëtare. Bunkerin nuk e dogjëm ne, e dogji populli. Shqiptarja.com
