Mbrëmjen e kësaj të mërkure, Prishtina do të jetë skena e një përballjeje të fortë në basketbollin e Ligës Unike për meshkuj, mes ekipit vendas Sigal Prishtina dhe kampionëve të Shqipërisë, Besëlidhja e Lezhës. Ndeshja, e cila pritet me interes të lartë nga tifozët e të dyja ekipeve, do të nisë në orën 20:00 në kryeqytetin e Kosovës. Pas fitimit të titullit kampion vitin që shkoi me 27 fitore resht dhe asnjë humbe dhe një kampionati sërish të suksesshëm edhe këtë vit, ekipi i Besëlidhjes në basketboll hedh sytë tashmë nga fitimi edhe i Ligës Unike.
Më herët, Presidenti i ekipit Ylli Ujka është shprehur për mediat me optimizëm për projektin afatgjatë të Besëlidhja Basket, duke theksuar se synimet e klubit janë të qarta dhe të strukturuara.
“Unë e shoh çdo projekt vetëm afatgjatë. Gjithçka ka një të mirë, të japësh për qytetin tënd është krenari. Të shohësh njerëzit që festojnë kur marrim një trofe kombëtar përpara qyteteve me sponsorë dhe klube me histori, është një arritje e madhe. Ne kemi fituar kampionatin kombëtar dhe synojmë të përfshihemi në garat europiane, por gjithçka hap pas hapi. Jemi duke punuar me Bashkinë për të ndërtuar një pallat sporti, një domosdoshmëri për qytetin tonë. Shpresojmë për mbështetje nga Federata dhe shteti që të realizojmë këtë projekt,” u shpreh Ujka.
