Banka Evropiane për Rindërtim dhe Zhvillim është duke shqyrtuar një kredi prej 34.5 milionë euro për hekurudhat shqiptare.
Bëhet fjalë për financimin e projektit të hekurudhës Tiranë-Durrës dhe lidhjes së saj me Aeroportin Ndërkombëtar të Rinasit, një segment i ri ky prej 7.4 kilometrash.
Projekti është pjesë e Route 2 të Rrjetit Kryesor Ballkanit Perëndimor, që lidh qytetin e Podgoricës në Mal të Zi dhe Vlorën në Shqipëri dhe është themeluar si një zgjatje treguese të Rrjeteve të Transportit Trans-Evropiane (TEN-T) në hekurudhën kryesore për Ballkanin Perëndimor, raporton KP.
Brenda vitit kjo kredi duhet të marrë miratimin e bordit të bankës. Sipas BERZH, projekti parashikon rehabilitimin e linjës hekurudhore me një gjatësi 34.7 km si dhe ndërtimin e terminaleve të kryeqytetit dhe Durrësit.
I gjithë financimi i parashikuar nga pala shqiptare për rehabilitimin e hekurudhës është 86.4 milionë euro.
Pikat kryesore që kërkohen janë realizmi i një plani menaxhimi të aseteve të kompanisë dhe një vlerësim të kostos së plotë të operimit dhe mirëmbajtjes së rrjetit.
Kthimi i hekurudhave shqiptare në rentabilitet dhe promovimi i ekonomisë së gjelbër duke synuar transport me emetim të ulët të gazit karbonik. (b.an)
