Silvio Berluskoni i jep lamtumirën Milanit me një letër drejtuar të gjithë tifozëve kuqezi. Në letrën e tij “Kavalieri” thotë se Milanin e shiti nga dashuria, pasi beson se klubi do të rikthehet në ditët e tij më të mira me investitorët e rinj kinezë.
“Tridhjetë vjetë më parë Milanin e mora nga dashuria. E jap atë për një dashuri akoma më të madhe: Ia besoj skuadrën një grupi që ka resurset e nevojshme dhe dëshirën për të investuar dhe për ta konkurroj me klubet më të mira ndërkombëtare. Natyrisht jam i prekur dhe i pikëlluar, por jam edhe i lumtur në bindjen për të vepruar edhe njëherë për të mirën e Milanit”,thotë ai. Ndërsa falënderon bashkëpunëtorët në tri dekadat në krye të një ndër klubeve më të suksesshme në Itali dhe më gjerë. “Në këto 30 vite do të më mbesin në zemër kujtime të jashtëzakonshme, të pakrahasueshëm: Pata privilegjin që të drejtoj klubin që dua deri sa e bëra klubin më të titulluar në botë. Kujtoj dhe falënderoj lojtarët e mëdhenj, trajnerë dhe drejtues të suksesshëm, shumë prej të cilëve do të jenë përgjithmonë pjesë e legjendës së futbollit, atë legjendë që kontribuuam duke e shkruar me fitore të jashtëzakonshme në Itali, Evropë dhe në botë”,thotë Berluskoni në letrën e tij. Duke folur për tifozët ai shprehet se: “Mbi të gjitha nuk do të harroj pjesëmarrjen time dhe mbështetjen e tifozëve. Pasioni i miliona tifozëve për ngjyrat kuqezi ishte vendimtar për ta bërë këtë skuadër të veçantë, të ndryshme nga gjithë të tjerat, më të fortë nga të tjerat, më të fortë se zilia, më të fortë se padrejtësia, më të fortë se fati i keq”. Berluskoni e mbyll letrën e tij me shpresën se Milani do t’i rikthehet lavdisë së dikurshme dhe me përqafimin e tifozëve kuqezi./Panorama
