Ish-kandidati për kryetar të PD, Fatbardh Kadilli ka deklaruar se situate aktuale në Partinë Demokratike ka sjellë vetëm paqartësi.
“Padyshim ikja e Bashës ka sjellë paqartësi, sepse gjithçka duket se do të rifillojë aty ku dominon gjithsesi hija e tij. Atë Bashizëm, që fakt është kopja e zbehtë e berishizmit. Berishizmi është problemi i parë në Shqipëri, dhe nuk e di a do të mbijetojë asaj reforme në parti që ai po tenton të kalërojë”, thotë ai në “Absolut 4”.
Në lojë është e ardhmja e partisë. “Basha ishte ngarkesë e madhe për të gjithë grupin e tij, dhe në njëfarë mënyrë i ka çliruar. Por a ka ikur vërtet? Unë mendoj se është nga ato tërheqje që do të rikthehen pas, është e drejta e tij, por sot ka rëndësi e ardhmja e PD, sa i përgjegjshëm do të jetë grupi që ishte pranë tij, duke filluar nga zoti Alibeaj, zoti Gaz Bardhi etj. Këto figura duhet të ripropozojnë sërish vetveten, deri më tani narrativën e përcaktonte Basha, sot secili prej tyre mund të tregojë profilin e tyre”.
E ardhmja vjen edhe nga mënyra sesi do të menaxhohet një ribashkim i mundshëm, për të cilin po fillohet të flitet. “Rithemelimi sillet me mënyrën e fituesit. Në Shqipëri nuk jemi mësuar të jemi të kujdesshëm, secila palë ka kusuret e veta, si edhe tek shfaqja e shfaqja e 8 janarit”.
Sipas Kadillit, “ baza e partisë ka shkuar nga zoti Berisha, grupi tjetër duhet të përcaktojë për çfarë qëndron atje, jemi të shqetësuar për bashkimin, por në qoftë se bashkimi është një ndjekje individësh, nuk do të jetë i vërtetë, por një dominim berishian. Po të bashkohemi në idetë dhe parimet, kjo nuk mund të matet me numrat që një ka dhe tjetri nuk ka”.
g.kosovari
