Nga Mero Baze
Sali Berisha duket i penduar plotësisht që i hyri aventurës së votimit të diasporës dhe po kërkon rrugëdalje. Rrugëdalja e vetme zyrtare është të refuzojë të votojë ndryshimin teknik të ligjit, që mundëson afatet e dërgimit të votës nga diaspora.
Edhe pse në parim ka rënë dakord, ai po nxjerr përditë nga një “bisht” për të justifikuar dështimin e votës së diasporës.
Këtë javë ka shpikur idenë e votimit të shqiptarëve që nuk kanë dokumente identifikimi shqiptare. Dhe, për ta bërë këtë shpikje më të besueshme, thotë se përjashtohen 1 milion e ca shqiptarë.
Sipas burimeve zyrtare të KQZ-së, shqiptarët e ikur pas vitit 1991 jashtë Shqipërisë, të cilët nuk kanë aplikuar për dokumente zyrtare shqiptare, janë rreth 150 mijë dhe jo 1 milion e ca. Por ata janë shqiptarë që kanë hequr dorë nga Shqipëria dhe nuk u hyjnë më në punë.
Vetë sistemi ligjor që ka votuar PD-ja nuk lejon të votojnë njerëz që nuk kanë dokument biometrik shqiptar. Sepse, po të jetë për njerëz me origjinë shqiptare, me këtë kriter i bie të votojnë edhe arbëreshët, arvanitasit dhe diaspora e arbëreshëve në Argjentinë madje. Dhe Sali Berisha e di këtë.
Arsyeja pse po shpik këtë është për të rritur presionin që të mos votohen ndryshimet ligjore që mundësojnë votimin e diasporës, por në fund do t’i votojë ato. Sepse, më shumë sesa për të votuar, Berishës i duhet kjo betejë për të legjitimuar njollosjen e zgjedhjeve.
E vetmja gjë që Berisha po kërkon këto kohë është të mbledhë arsye për të thënë pse humbi dhe pse zgjedhjet nuk ishin të ndershme. Dhe njollosja e procesit përmes votimit të diasporës është e lehtë.
Që të biem dakord, është një votim që rrezikon të jetë familjar ose kolektiv, rrezikon të jetë i parablerë dhe i identifikueshëm si proces. Por ky është standardi për të cilin ata vetë kanë rënë dakord.
Që Berisha ta ekspozojë më shumë njollosjen e zgjedhjeve, thjesht do të bëjë fushatë me protesta para Ambasadave, meqë nuk mbledh dot njerëz në takime në diasporë.
Me dëshirë, nuk do ta kishte pranuar fare të votonte diaspora, por tani është vonë për t’u kthyer pas, sepse bllofi që hodhi i doli për keq. Kështu që, së paku, ta përdorë këtë votim për të njollosur zgjedhjet. Është e vetmja gjë që i duhet pas 11 majit. Fitoren e ka harruar edhe vetë.
