Ish-kryeministri Sali Berisha ka paralajmëruar mos njohjen e zgjedhjeve lokale të 14 majit duke akuzuar për farsë dhe manipulim. Gjatë karrierës së tij politike, Berisha nuk ka njohur çdo humbje përveç zgjedhjeve parlamentare të 2013 kur dha dorëheqjen si kryetar i PD.
Berisha doli në një deklaratë për mediat mesditën e sotme ku foli në lidhje me rezultatet e deritanishme të zgjedhjeve të 14 majit. Ai e cilësoi si një ditë tepër të vështirë dhe të rëndë për liritë dhe të drejtat e shqiptarëve.
Sipas Berishës, ky është një moment agonie për vlerat demokratike në vend, ndërsa u bëri thirrje të gjithë komisionerëve të opozitës që të vijojnë punën deri në numërimin e votës së fundit, edhe pse, sipas Berishës, ndaj tyre ka presione të mëdha.
“Industria e tmerrshme e blerjes së votës, bota e krimit dhe oligarkisë dhunuan si kurrë në historinë e këtij vendi, votën e shqiptarëve. Janë të panumërta aktet, veprimet, të cilat dëshmojnë se gjatë këtyre muajve, narko-shteti zbatoi programin e asgjësimit të lirisë së votës, të blerjes së saj, terrorizimit të zgjedhësve shqiptarë.
Kjo është një ditë e vështirë, një ditë e rëndë për liritë dhe të drejtat e qytetarëve shqiptarë. Është një moment agonie për vlerat demokratike në vend. Unë jam këtu për të dënuar me forcën më të madhe, për të hedhur poshtë këtë farsë elektorale, e karakterizuar nga alfa tek omega, nga krimi shtetëror elektoral dhe krimi ordiner.
Jam këtu gjithashtu për të bërë thirrje të gjithë përfaqësuesve të opozitës në komisionet e numërimit të vazhdojnë me përkushtim detyrën e tyre, pasi është në qëllimin tonë të bëjmë gjithçka për mbrojtjen e votës së qytetarëve shqiptarë.
Së fundmi, dënoj me forcë dhunën e përdorur në Kurbin ndaj një komisioneri, për faktin e vetëm se duan me çdo kusht të diktojnë, të ndryshojnë rezultatin në këtë bashki siç kanë bërë me shumicën e bashkive të vendit. Shpreh solidaritetin tim me komisionierin Ismail Ismaili, dhe me të gjithë komisionerët e tjerë, që me shumë vështirësi, po përmbushin detyrimin e tyre.”
SALI BERISHA
/s.f
