Dihet publikisht tashmë që ish-Kryeministri Sali Berisha, pjesën më të madhe të denoncimeve që bën në Facebook ja adreson të ashtuquajturit “qytetari dixhital”.
Por ndonëse aludimet kanë qenë të shumta, duket se vetë ish-Kryeministri la të nënkuptuar se kush fshihet pas “qytetarit dixhital”. I ftuar në emisionin “Studio e Hapur” Berisha u pyet në lidhje me publikimin e videos nga aksioni i Policisë në Babicë, pamje të cilat u raportuan se i ishin dhënë nga Prokurori Vladimir Mara.
Por vetë Berisha ka thënë në emision se nuk ka qenë Prokurori, por një burim tjetër duke lënë të nënkuptohet se burimi i tij mund të jetë edhe nga Shërbimi Informativ Shtetëror. Madje ai shkoi më tej duke treguar se në bazë të burimeve që ai ka, operacioni i policisë kishte ardhur pas të dhënave të mbledhura nga SHISH.
Operacioni në Babicë, ju publikuat i pari videon. Ka një akuzë se videon ua ka dhënë prokurori?
Berisha: Absolutisht jo, nuk ma ka dhënë prokurori. Burimi tjetër krejtësisht dhe jo prokuror. Është hera e parë që dëgjoj për atë prokuror. Vladimir a si. Asnjëherë, asnjë prokuror. Ajo ishte rezervati i Habilajve dhe u kapën 4 ton, 20 mln euro. U shemb toka aty dhe tani na pengoi ky, na prishi operacionin.
Sulo: A e dekonspiruat operacionin?
Berisha: Aksioni atyre, u plasi bomba në dorë. Ai ishte një operacion i organizuar nga Shërbimi i fshehtë që s’ka fuqi zbatuese por prokuroria ka grupin e vet dhe mori dhe policinë.
Ndërsa i pyetur nëse ka lidhje familjare me tre prokurorët e çështjes Tahiri, ish-Kryeministri tha:
“Sali Berisha ka lidhje me tre prokurorët, aq sa ka lidhje me zonjën Tahiri që është nga Kosova. Zero lidhje! Ky është vetëm geni primitiv i krahinorizmit të Edi Ramës ku si i mbytur kërkon të mbështetet. Asnjë lloj lidhje me të, përveçse janë nga Tropoja. Si e shoqja e Saimirit. Ky është Noriega. Noriega gjeti si pretekst se këta qenkan kushërinj të mi. Njëri kushëri i im, tjetër i djalit.”
