Berisha vijon “frymëzimin” nga Trump: Sapo të fitoj, do të bëj një audit të tipit Elon Musk për t’i kthyer paratë shqiptarëve

Kryedemokrati Sali Berisha është shprehur se pasi PD të vijë në pushtet, do të bëjnë një audit të tipit të Elon Musk në SHBA, në mënyrë që t’u kthehen paratë shqiptarëve.

Komentet Berisha i bëri gjatë fjalës së tij ku u prezantua “Libri i Zi i Rilindjes”, një projekt i Departamentit Brain Gain, që sipas PD, është një dokument i detajuar mbi dështimet dhe skandalet e qeverisë aktuale.

Berisha tha gjithashtu se qeverisja Rama e këtyre 12 vitevë është piramida më e madhe e mashtrimit në histori pas Enver Hoxhës.

Pjesë nga fjala e Berishës:

Këto ditë po lexoja një fjalë të presidentit Trump.

Çfarë thoshte? Presidenti Trump thoshte më i keqi është gënjeshtari. Më i keqi se çdo njeri tjetër. Të rrëmben kohën dhe i numëronte me radhë të këqijat e gënjeshtarit.

Po në qoftë se e përfytyron në një moment këto 12 vite, këta janë piramida më e madhe e mashtrimit në histori pas Enver Hoxhës.

Ndaj dhe Libri i Zi, jo vetëm u paraqet shqiptarëve të zezat e këtij regjimi, por Libri i Zi paraqet para shqiptarëve potencialet e mëdha që ekzistojnë për PD-në, domosdoshmërinë e një auditi të tipit Elon Musk në mënyrë që t’u kthehen paratë shqiptarëve dhe Shqipërisë.

Dhe unë u garantoj se kjo do ndodhë.

Ndaj dhe në programin tonë, shtyllë kryesore krahas paketës së dhembshurisë, krahas Made in Albania, krahas Shqipërisë Madhështore, kemi përcaktuar pastrimin e shtëpisë tonë.

Kjo është shtyllë themelore.

Në qoftë se ne nuk bëjmë pastrimin e shtëpisë tonë, ne kemi mashtruar shqiptarët.

Ne do bëjmë pastrimin e shtëpisë tonë.

Ne do rendim pas çdo qindarke të vjedhur qytetarëve shqiptarë dhe do ua kthejmë atyre.

Të gjitha pasuritë e vendosura mbi paratë e vjedhura do u kthehen atyre.

Të gjitha pasuritë e krimit do u kthehen atyre.

Askush nuk ndalet. Ne do ndalemi.

Narkoeuro. Euro, kjo monedhë e bekuar, në Shqipëri është shndërruar në një monedhë ndëshkuese. Shkatërron për shkak të drogës të gjitha bizneset e eksporteve. Mbyllen njëra pas tjetrës.

Zero tolerancë ndaj krimit të organizuar dhe narkoeurove.