Berisha trondit polakët: Jam shqiptar
Basketbollisti nga Peja, Dardan Berisha, ndihet shqiptar, edhe pse e përfaqëson Poloninë. Basketbollisti pejan nuk e ka fshehur atë që e ndien në zemër, gjatë pyetjes provokuese që ia bënë mediet polake. Ishbasketbollisti i Pejës dhe Sigal Prishtinës do t’i mbrojë ngjyrat ‘bardhekuq’ në Kampionatin Evropian të basketbollit, i cili mbahet muajin e ardhshëm, por nuk përjashtohet mundësia që në të ardhmen ai ta përfaqësojë Kosovën.
Edhe pse u është mirënjohës polakëve për gjithçka që i dhanë, prapëseprapë, basketbollisti më i mirë i Ligës Ballkanike sezonin e kaluar, ndihet shqiptar. “Jam lindur, kam shkuar në shkollë, e kam përjetuar luftën dhe kam jetuar me familje në Kosovë. Jam mjaft i lidhur me Poloninë, por nuk ndihem 100 për qind polak. Unë ndihem shqiptar i Kosovës”, ka thënë 26 vjeçari në një intervistë për të përditshmen polake, “Gazeta Wyborcza”.
