Kryetari i Partisë Demokratike, Sali Berisha, ka reaguar në rrjetet sociale pas vdekjes së ish-kryeministrit Fatos Nano. Ai i shpreh ngushëllime familjes, ndërsa thekson se Nano ka meritën për reformimin e Partisë Socialiste.
“Fatos Nanon mbyll sytë përgjithmonë. Të dashur miq, Fotos Nano, ish-kryeministër i vendit dhe ish-kryetar i Partisë Socialiste, personalitet kryesor i të majtës shqiptare gjatë tranzicionit, mbylli sytë përgjithmonë. Fatos Nano ka meritën e reformimit të Partisë Socialiste, anëtarësimin e saj në forume të majta ndërkombëtare si dhe pranimin nga ai vetë të rotacionit të pushtetit. Me këtë rast shpreh ngushëllime familjes, miqve, të afërmve të tij dhe socialistëve. Amen”, shkroi Berisha në Facebook.
Fatos Nano ndërroi jetë këtë të premte, 31 tetor, në moshën 73-vjeçare. Ai ndodhej në reanimacion prej afro një muaji, në një spital në kryeqytet.
Fatos Nano dhe Sali Berisha janë të parët politikanë të dy partive kryesore të vendit që janë ballafaqur në një debat televiziv.
Kjo ka ndodhur në vitin 2002 në emisionin “Opinion” në Tv Klan duke e bërë debatin më të famshëm dhe më të ndjekur në vend.
Ai emision u transmetua në atë kohë edhe në Kosovë, Maqedoni dhe Mal të Zi, ku Nano e Berisha “rrahën” mendimet ballë për ballë.
Fundi i emisionit që zgjati dy orë u mbyll me një shtrëngim duarsh mes të dyve.
