Pavarësisht se opozita ka bllokuar gjatë gjithë seancës foltoren e kuvendit, madje edhe duke goditur tavolinat për të bërë zhurmë, punimet kanë vijuar dhe të gjitha ligjet janë miratuar me votat e maxhorancës.
Në dalje të parlamentit, ish Kryeministri Sali Berisha ka folur në lidhje me kërkesën kryesore të demokratëve, mosdërgimin në Gjykatën Kushtetuese të mandateve të deputetëve socialistë Rakip Suli dhe Valentina Leskaj. Berisha tha se ky parlament duhet shkrirë. Madje, Berisha i ka çuar edhe një sinjal Presidentit Bujar Nishani, duke thënë se pavarësisht se ai nuk e ka në tagër ligjor, përsëri, duhet të shprehë qëndrimin e tij në lidhje me mosdërgimin e mandateve të socialistëve në Gjykatën Kushtetuese.
“Parlamenti meriton vetëm një qëndrim, shkrirjen e menjëhershme të tij, ky parlament nuk meriton të ekzistojë më.. e ftoj opozitën të marrë të gjitha vendimet sepse një situatë e tillë është kazëm në themelet e shtetit.
Imagjinoni ju se cjan të aftë këta kur shkelmojnë vendime e asaj gjykate që janë të Barabarta me normat kushtetuese… këta qeveritarë, shkelmojnë harbutërisht mbi vendimet e Gjykatës, duke i marrë pushtetin.
Ftoj Gjykatën Kushtetuese, që të mos pranojë këtë mënyrë…. Ju e dëgjuat vetë se mandati i Kokëdhimës shkoi në Gjykatë jo për të zbatuar vendimin e Gjykatës, por na rezulton se u bë nga Gramoz Ruci, për të ndëshkuar sekretarin e ardhshëm të përgjithshëm.
Parlamenti është shndërruar në një kështjellë apo bastion të krimit e kusarëve.
Presidenti republikës nuk ka prerogativa kushtetuese, sepse në kushtetuta të tjera ai është përmbaruesi i vendimeve… por Presidenti republikës duhet të konsultohet gjerëisht me juristët për të marrë këshillën dhe për të shprehur për këtë çështje.”- tha Berisha.
Në lidhje me Byronë Kombëtare të Hetimit dhe deklaratën e LU-së se Reforma do duhet të kalojë së bashku (njëkohësisht) me BKH-në, Berisha i qëndroi pozicionit të tij të mëparshëm.
“Skema ime është kjo të votohet byroja si kapitulli i parë, në një marëveshje e cila do ti detyrojë palët që të votojnë cdo kapitull i reformës. Por nuk ka nevojë që të presim, që të fillojë votimit për Byronë.”- tha Berisha.
