Ky rasti i Sali Berishës, me këshilltarin e tij amerikan, duhet të jetë rasti i vetëm në botë, ku kandidati për kryeministër flet si këshilltar i fushatës, ndërsa këshilltari i fushatës flet si kryeministër.
Në gjithë fjalorin e Sali Berishës këto 10 ditë, kur ka prezantuar LaCivitën, ka vetëm shprehje të tilla: “Rama i tmerruar nga LaCivita”, “LaCivita do ta shaktërrojë Ramën”, “LaCivita do ta bëjë Shqipërinë të madhe përsëri” (vetëm, në kohë të fashizmit kemi qenë Shqipëri e Madhe), dhe broçkulla të tjera.
Është normale që një strategjist fushate të furnizojë kandidatin për kryeministër me ide dhe batuta dhe t’i hedhë në luftë me rivalin e tij për kryeministër, por ky rasti i Berishës është i përmbysur. Berisha këshillon këshilltarin se çfarë t’i thotë Ramës dhe pastaj na e tregon se si e tha këshilltari.
Kështu që ne tani jemi detyruar të dëgjojmë gjithë gomarllëqet e Berishës, që ka 34 vjet që i thotë shqip, ndërsa tani ia thotë në anglisht këshilltarit të fushatës së tij. Kjo nuk ndryshon mendimin tonë që ato janë gomarllëqe, por bën qesharake fushatën e Berishës, pasi në fund të fundit Rama nuk po garon me LaCivitën, por me Berishën.
LaCivita mund ta dijë vërtet se ne kemi qenë “Shqipëri e Madhe” në kohë të Berishës, por në fakt kemi qenë vend tranzit për naftën e ushtrisë jugosllave, që poshtëronte gjysmën e kombit tonë. Larg qoftë të na kthejë përsëri tek ajo kohë.
Ose vini re se si Berisha flet për kriptomonedhat, meqë flet dhe Trumpi me Elon Musk, dhe thotë se qëllimi i tij është Bitcoin. T’ia shpjegojnë se Bitcoin është një nga kriptomonedhat, të cilat janë me mijëra, dhe se duke folur kaq shumë gjëra të trasha, vetëm që u mbushet mendja e shqiptarëve, të cilët akoma nuk kanë idenë se pse flet.
Vetëm një vit më parë, kur Edi Rama miratoi ligjin për kriptomonedhat, ai e sulmoi me tërbim se futja në tregun e kriptomonedhave bëhet për të pastruar paratë. Tani, meqë ka parë Trumpin me monedhë të vet dhe Elon Musk që dikton fuqinë e Bitcoin, mendon se mund të ketë edhe një monedhë Berisha që të ketë ku të fusë lekët Shkëlzeni.
E dimë që LaCivita nuk ka faj se duhet kohë të kuptojë nga ku ka ardhur dhe çfarë klienti ka, por meqë Berisha ka zakon që i këshillon këshilltarët para se ata të këshillojnë, është mirë që LaCivita të pyesë herë pas here për çfarë e ka këshilluar Berishën, pra që të jetë i informuar që të mos t’i duhet të mbrojë gomarllëqet e tij në publik.
Si ajo pagesa 150 mijë euro për New York Times, apo këto historitë me Shqipërinë e Madhe dhe Bitcoin. Në atë moshë që ka Berisha, mirë edhe aq, por LaCivita e ka jetën përpara dhe nuk ka pse të bëhet qesharak 60 vjeç.
