Sali Berisha replikoi me deputetin socialist Taulant Balla, duke e quajtur disa herë “mashtrues të pafytyrë”, pas fjalëve të këtij të fundit se vajza e ish-kryeministrit merrte çdo muaj 3 mijë euro si konsulente nga Besnik Sulaj. Berisha i kujtoi Ballës se është i dënuar nga gjykata për shpifje.
“Mashtruesi që foli këtu është i dënuar nga gjykata si shpifës i pafytyrë, të paktën tri herë. Është një mashtrues, i cili përpiqet të mbulojë vjedhjet e mëdha që vetë ai, motra e tij, bashkëshortja e tij, që ndërrojnë emrat e kompanive tri herë në javë.
Është mashtrues i denoncuar edhe dje. Nuk jam unë që kam përmendur kompaninë e Sadri Abazit, por ti s’ke fytyrë. Unë të kam përmendur Veizajn, atë ke nga unë ti.
Ky është Flamur Veizi dhe djali i tij Rrushi, përfitues kryesor në shkatërrimin që po i bëhet pyjeve të Librazhdit. I arrestuar nga policia e Elbasanit dhe i liruar menjëherë me ndërhyrjen tënde”.
Berisha hodhi poshtë pretendimet që vajza e tij, Argita Malltezi, të ketë marrë para nga Sulaj.
“Do të ballafaqohemi prapë në gjykatë, sepse ajo nga 2007 deri më 2008 s’ka pasur asnjë aktivitet tregtar, sepse ka pasur probleme akademike.
Ajo s’ka marrë asnjë qindarkë nga kryemafiozi Besnik Sulaj. Por s’ke fytyrë ti”, tha Berisha.
“Nuk të them se je një kryekriminel, ti je një kusar, vetëm kaq”.
D.I.
