Përplasjet e kësaj të enjtë mes opozitës dhe maxhorancës janë fokusuar në reformën në drejtësi dhe byronë kombëtare të hetimit. Ish Kryeministri Berisha tha se është Kryeministri Rama ai që nuk e do krijimin dhe ngritjen e Byrosë Kombëtare të Hetimit, pasi sipas tij kreu qeverisë ka frikë se mund të zbulohet korrupsioni i tij personal në lidhje me ilën e tij në Surrel dhe të tjera ndërtime.
“Ti nuk e do Byronë e Hetimit, sepse Byroja do të fillojë me Surrelin, do fillojë me pallatin 5 katësh. Krijove një grup ti, me në krye Xhafën, përfaqësues të klaneve të drogës”- tha Berisha.
Berisha ka akuzuar kryeministrin po ashtu edhe për reformën në drejtësi, duke thënë se i vetmi që e pengon atë është Kryeministri. Sipas Berishës, Edi Rama në takime me ambasadorët thotë se reformën nuk e pranon Ministri Ylli Manjani.
“Njeriu që saboton reformën në drejtësi është Edi Rama. Këtë ua them me fakte të pakundërshtueshme. Njeriu që pengon Byronë Kombëtare të Hetimit është Edi Rama dhe gënjen të tjerët duke thënë që sma pranon Ylli Manjani… Manjani thotë atë që ka thënë Sali Berisha, Pandeli Majko dhe çdo deputet tjetër. Nuk mund të bëhet Edi Rama kryehetues, Edi Rama kryeprokuror, Edi Rama kryegjykatës. Byroja e hetimit përputhet me vendimin e Gjykatës Kushtetuese. Po pse ça je ti, kryeministër që të pengon një ministër? Po ti s’je kryeministër.”- deklaroi Berisha.
Në reagim të akuzave të Berishës ka folur kreu grupit parlamentar të PS-së Gramoz Ruçi i cili tha se ky i fundit është i vetmi person që përdhunon ekspertët e reformës në drejtësi.
“ Punë e lavdërueshme e komisionit parlamentar shqqiptar dhe punë ekselente e ekspertëve shqiptarë, ça bërë ti sot? ti sulmove komisionin dhe ekspertët. Si ka mundësi të përdhunosh ata që janë jashtë kësaj salle jo vetëm për punën që kanë bërë por për atë çfarë përfaqësojnë, ke të bësh me një ekspert që për 10 vjet përfaqësoi shqiptarët si gjyqtar i gjykatës së Strasburgut dhe këtu në sallë ti se ke votuar, dhe s’është socialist, është i djathtë. Ti vazhdon ta sulmosh atë”,- replikoi Ruçi
