Kreu i Partisë Demokratike, Sali Berisha, në mbledhjen e grupit parlamentar të Partisë Demokratike, deklaroi se “Parlamenti është kthyer absolutisht në kohën e diktaturës staliniste”, por shtoi se deputetët demokratë do të qëndrojnë aty “me vendosmërinë më të madhe”.
“Vetëm në diktaturë një deputet bëhej përgjegjës për ato që fliste në Parlament dhe jashtë tij. Kjo po ndodh sot në këtë Parlament. Ne nuk kemi bërë gjë tjetër, vetëm kemi mbrojtur interesat e zgjedhësve tanë. Parlamenti është bërë i padurueshëm për qytetarët. Qytetarët kanë një neveri të jashtazakonshme. Prapë ne do qëndrojmë në parlament me vendosmërinë më të madhe”, deklaroi Berisha.
Më tej, kreu demokrat përsëriti se Edi Rama duhet të largohet: “Ortaku, korruptori i McGonigal nuk mund të ketë vend më si kryeministër i Shqipërisë. Ai duhet të ikë! Ngritja e komisionit hetimor parlamentar nga opozita është jetik. Është jetik sepse veprimtaria e grupit kriminal McGonigal në Shqipëri ka qenë një veprimtari intensive, shumëplanëshe, e ngërthyer me qeveritarë, me zyrtarë, me gjykatës, me prokurorë, me gjithçka në funksion të pushtetit të Edi Ramës. Ndaj dhe natyrisht kundër sigurisë së SHBA, se çdo akt i korruptimit të tij, ka kërcënuar sigurinë e SHBA. Vendi është në terrorin e narkoshtetit, siç e shihni. Në Sarandë zhduken gjurmët e një hoteli nga një ngarkesë tritoli që rrezikoi 30 banesa. Në Vlorë kapen mina me sahat dhe ngarkesa tritoli. Kamerat e kriminelëve, shkruante sot Financial Times, po kontrollojnë Shqipërinë. Vilat janë shndërruar në shtëpi bari kudo. Cilido që do të njihet me një narkoshtet, e ftoj të vijë në Shqipëri. Edhe kjo përbën një imperativë të largimit të tij një minutë e më parë”.
/s.f
