Ministri i Brendshëm, Bledi Çuçi ka reguar në lidhje me protestën e paralajmëruar më 6 dhjetor nga Sali Berisha, ditën ku në Tiranë për herë të parë zhvillohet Samiti i Bashkimit Europian me vendet e Ballkanit Perëndimor.
Në një postim që ka bërë në rrjetet sociale, Çuçi u shpreh se Berisha nuk lë rast pa tentuat për t’i bërë keq Shqipërisë. I bindur ministri tha se edhe mbështetësit do ta braktisin Berishën në aktin e tij të radhës.
“Vetëm një antishqiptar si Sali Berisha, që i do të keqen këtij vendi nga dëshpërimi i non gratës dhe i rublave ruse që i dolën sheshit, kërkon të turpërojë Shqipërinë më 6 dhjetor, ditën kur Tirana mirëpret për herë të parë Samitin e Bashkimit Europian me vendet e Ballkanit Perëndimor. Në grahmat e fundit politike të tij, ky njeri nuk le rast pa tentuar për t’i bërë një tjetër të zezë Shqipërisë, fiks si të ishte një Konsull famëkeq i Vladimir Putinit.
Jam i bindur se edhe mbështetësit e Partisë Demokratike, të cilët mund të kenë shumë arsye për të qenë opozitarë me qeverinë, do ta braktisin Sali Berishën në aktin e tij të radhës për t’i lënë Shqipërisë një tjetër damkë turpi në sytë e gjithë botës. Sigurisht që Tirana atë ditë do jetë kryeqyteti më i sigurt, më miqësor dhe më mikpritës i Europës”- shkruan ai.
/s.f
