Ish deputeti i PD, Bardh Spahia ka qenë i ftuar në studion e emisionit “Me Xhaxhiun” në Fax News ku ka dhënë këndvështrimin e tij mbi situatën ku është PD dhe nevojën emergjente për të pasur një ndryshim radikal.
Ndër të tjera, Spahia ka theksuar shumë faktin se PD duhet të rikthehej tek vlerat e konservatorizmit që sipas tij në vitet e fundit kishin humbur, duke shënjestruar kështu edhe kryetarin aktual të demorkatëve pasi përgjegjësia më e madhe bie mbi të.
Ish deputeti tha se kriza e krijuar në PD vinte edhe prej arsyes se prej vitesh partia nuk po nxjerr më figura të reja të qenësishme që të arrijnë të bëjnë karrierë ndryshe nga koha kur e drejtonte Berisha, kohë në të cilën sipas Spahisë, kishte pasur një shtysë në përparimin e karrierave politike të individëve të ndryshëm.
Spahia: Ka pasur një situatë që nuk do e konsideroja normale dhe kjo ka qenë e dukshme. Mohimi I këtij realiteti nuk bën gjë vecse fsheh elefantin brenda në dhomë. Në këtë kontekst pas një kohe të gjate reflektimi shpreha se kjo krizë do duhet të ishte tamponuar në momentin e duhur kur ishte koha dhe të frenohej përcjellja e kësaj carje të madhe drejt strukturës së PD. Tanimë kjo ka ndodhur dhe këtu dua të theksoi faktin e mungesës së eksperiencës. Unë e kam pritur këtë dhe kam sugjeru që iniciativat për thirrjen e Kuvendit Kombëtar të ishin bërë para syve të drejtuesve të PD.
Moderatori Rezear Xhaxhiu: Si duhet ta lexojmë këtë krizë të PD, si krizë ideologjike, si krizë lidershipi apo si krizë si rezultat i përpjekjeve të dy figurave kryesore në funksion të interesave personale?
Spahia: Në këndvështrimin tim, ka një krizë filozofie politike në linjën e ndjekur nga PD së fundmi. Padyshim që nëse ka një shmangie nga konservatorizmi përgjegjësia bie edhe mbi drejtuesin. Në këtë rast më shqetëson kjo shmangie nga boshti i ideologjisë konservative.
Xhaxhiu: Çfarë tip konservatorizmi bën fjalë zoti Berisha? Sa realiste është kjo tezë e konservatorizmit?
Spahia: Të qenurit konservator do të thotë se je në avantazh me të tjerët. Duhet të njohim edhe realitetin shqiptar. Mos të harrojmë se ka qenë edhe një parti që në një vend si Shqipëria ka tentuar të afrojë rreth vetes këdo që e ka zgjedhur programin e saj. Mendoj se përtej asaj çfarë thuhet dhe mundohet të mbulohet me një propagandë të jashtëzakonshme, PD ka qenë partia e modernitetit në Shqipëri. Në këtë aspekt i kemi lënë me vite dritë mbrapa. PD ka nevojë të menjëhershme t’u rikthehet parimeve bazë.
Xhaxhiu: A ka nevojë sot PD që të kthehet në një parti tipike perëndimore?
Spahiu: Ka nevojë dhe ka edhe fuqi ta bëjë. Me një mekanizëm, pra me anë të votës së lirë brenda struklturës së PD. Kushdo që lufton për votën e lirë do të thotë se është në favor të këtij ndryshimi. Është tentuar edhe nga anëtarë të tjerë të kandidojnë për postin e kryetarit dhe kjo tregon dinamikë.
Xhaxhiu: A mundem unë të besoj tek një parti modern me një lider si Berisha?
Spahia: Nëse një personazh më tregon se u jep përparësi parimeve, garave dhe demokracisë nuk ka rëndësi mosha, për mua është i ri sepse nuk ka të bëjë mosha në këtë gjë. Kanë rëndësi parimet që zgjedh të mbrosh.
Berisha është e vërtetë se ka pasur një autoritet brenda të PD por nuk ka penguar kurrë karierën e askujt, përkundrazi i ka stimuluar ato karriera. Ndërsa nga 2013 ne vuajmë për figura të qenësishme. Ne kemi pasur një frenim dhe stopim të këtyre figurave.
/b.h
