Komiteti i Jashtëm i Parlamentit Europian ka nisur disktutimet mbi raportin vjetor të eurodeputetit, Lucas Mandl mbi bashkëpunimin në luftën kundër krimit të organizuar në Ballkanin Perëndimor. Raporti është në fazën e propozimeve për amendime nga anëtarët e tjerë të Komitetit të Jashtëm.
Amendimet e propozuara janë të shumta dhe përfshijnë të gjashta vendet e Ballkanit Perëndimor. Në rastin e Shqipërisë bien në sy dy propozimet e bëra përkatësisht nga eurodeputetja Viola Von Cramon e të gjelbërve dhe nga eurodeputeti David Lega i grupit të të djathtëve.
Viola Von Cramon, që në PE mban edhe postin e raportueses për Kosovën propozon në amendime që i bëjnë thirrje Bashkimit Europian që të përqafojë praktikën e Shteteve të Bashkuara të Amerikës, duke sjellë si shembull shpalljen “non grata” të ish-kryeministrit Sali Berisha.
“(PE) mirëpret qasjen e rinovuar të angazhimit të SHBA në Ballkanin Perëndimor, përfshirë përqëndrimin e tyre në luftën kundër korrupsionit. Vlerëson në këtë kontekst urdhrin ekzekutiv të SHBA për të sanksionuar personat që kontribuojnë në destabilizimin e rajonit, si edhe aksionet që shënjestrojnë individë dhe ente për akte domethënëse korruptive në Bullgari dhe ish-Kryeministri Berisha në Shqipëri.
Bën thirrje që BE të ketë një qasje plotësisht të ngjashme me këtë (praktikën e SHBA)”, propozon eurodeputetja Von Cramon në amendimin e saj.
Eurodeputeti i së djathtës, David Lega propozon në amendimin e tij që në raportin vjetor mbi bashkëpunimin kundër krimit të organizuar të vihet theksi të korrupsioni, sipas tij, në nivele të larta në Shqipëri.
“Korrupsioni dhe krimi i organizuar mbeten një shqetësim serioz në Ballkanin Perëndimor; PE thekson si shembull, që në Shqipëri, korrupsioni është burimi i dytë më i madh i të ardhurave financiare të paligjshme (IFF), pas trafikut të narkotikëve. Banka Botërore vlerëson se 36.1 për qind e kompanive në Shqipëri gjatë 2019-s u përballën me të paktën një kërkesë për ryshfet”, propozon ai.
Eurodeputetë të tjerë kanë propozuar amendime të përgjithshme, por mes amendimeve gjen edhe propozime konkrete, si ai i eurodeputetit, Michael Gahler, që vë theksin e ekzistencës së në korridori të trafikut të lëndëve narkotike mes Kukësit dhe Tetovës.
Sipas tij, nga Kukësi në Tetovë trafikohet hashashi, ndërsa anasjelltas trafikohen lëndë narkotike më të rënda, si heroina.
Ai kërkon përmes amendimit që t’i bëhet thirrje Shqipërisë dhe Maqedonisë së Veriut që të shtojnë përpjekjet në luftën kundër trafikut të narkotikëve dhe të mbyllin rrugët e këtij trafiku./ Gazeta “Si”
/b.h
