Kryeministri Edi Rama ka debatuar këtë të enjte në parlament me ish Kryministrin Berisha, fillimisht në lidhje me akuzat e këtij të fundit se në prag të vizitës së Sekretarit Amerikan të Shtetit, me urdhër të Ramës doli në një intervistë televizive Nexhmije Hoxha. Për Berishën, kjo ishte një manovër që do të dëmtojë vendin, që pret këto ditë vizitën e shkurtër të John Kerry.
“Dënoj aktin tuaj të papërgjegjshëm,që në prag të kësaj vizite ju nxirrni korbin e zi, zonjën Hoxha. Ky këtu që është pas meje ka vite të tëra që deshte të bëhej një djalë i familjes së tyre por nuk u bë dot. Ishte një akt i papërgjegjshëm, nxjerrja e zonjës së zezë.
Nexhmije Hoxha është dora e zezë, është një kriminele pothuajse e të njëjti kalibër me të shoqin. Pasi u debilos nga sëmundja e të shoqit, lexoni po të doni memot e sekretarit të Hoxhës, cfarë thotë. Cdo gjë që thoshte ky i debilosuri e ndryshonte Nexhmija si deshte. Që do të thotë se në vitet e sëmundjes së Enverit e deri në vdekjen e tij, cdo gjë vinte nga Nexhmija.
Na nxjerr në intervistë Nexhmijen për të mbrojtur krimet makrabre. Kjo kurrë nuk mund të ndodhte në pragun e ardhjes së sekretarit të sthetit. Por më vjen mirë sepse kjo tregon se ti je i lidhur shpirtërisht me atë familje.”- tha Berisha.
Në përgjigje, Rama tha se është i habitur nga Berisha, pasi ai nuk po përmend Byronë Kombëtare të Hetimit. Rama ka ironizuar Berishën, duke thënë se ishte hera e parë që dëgjonte një term si debilosje.
“Tani, ndërkohë që të gjithë prisnin që të flisje për byronë e hetimit ti fole për byronë politike. Nuk e kuptova se për cfarë e pate këtë rrëshqitje në të kaluarën, por faktikisht të takonte këtu në këtë sallë që të korrigjoje vetveten dhe të mos merrje një gjobë të madhe për veten. Këtu në këtë foltore nuk ke lënë gjë pa thënë javën e shkuar, që të vinte draftin për byronë kombëtare të hetimit.
E ke lënë PD-në si kopsht pa drekë. E ke lënë atë të shkretin vetëm, dhe nganjëherë nuk e di se cfarë thotë.
Dhe tani po thoni atë që kemi thënë ne për këtë cështjen. Mirë do të ishte që një qëndrim serioz për ti dhënë fund kësaj farse të madhe që e orkestruat vetë dhe që në fund ju nxorri kaq gënjeshtra e kaq të cliruar vidash, ta mbani.
Përsa i përket vizitës së Sekretarit të Shtetit, prapa the gjëra të pavërteta. Vizita e tij ishte e planifikuar të bëhej në fund të viti të shkuar dhe stacioni i shqipërisë që ishte dhe përfundimtari u anullua për shkak të impenjimeve të sekretarit të sthetit për shkak të negociatave me Irakun. Faktikisht, ndryshe nga cpropaganduat ju, që ai shkoi vizitoi të gjithë rajonin dhe bojkotoi regjimin e oligarkëve të Tiranës, impenjimi ishte i marrë dhe i thënë se do të kryhej në një kohë të përshtatshme brenda fillimit të vitit.
Vetëm ti mban fjalime për kur flet për Kerryn dhe Nexhmijen, askush nuk e bën këtë gjë.”- tha Rama.
