Ish kryeministri Sali Berisha, i cili ndodhet në Bruksel në Forumin e Crans Montana’s, mbajti dje një fjalim në seancën kushtuar gjendjes në Europën Jug-Lindore. Në fjalën e tij zoti Berisha foli për rrezikun e ndikimit rus në Ballkan, veçanërisht marrëdhëniet intensive midis Beogradit dhe Moskës, për përballjet e nacionalizmave në Maqedoni, thellimin e segregacionit dhe kanionit që ndan maqedonasit nga shqiptarët, me gjithë progresin e rëndësishëm dhe të pamohueshëm që është bërë në zbatimin e marrëveshjes së Ohrit.
Ai kërkoi hetim të pavarur ndërkombëtar për terrorin shtetëror në Kumanovë si dhe denoncoi ato që ai i quan lidhje të ngushta të Edi Ramës dhe pushtetarëve të tjerë të mazhorancës me krimin e organizuar.
Duke denoncuar sipas tij bllokimin e plotë që Edi Rama i bëri procesit të dekriminalizimit dhe zbatimit të marrëveshjes së firmosur midis opozitës dhe pozitës me ndërmjetësimin e Parlamentit Europian, e mbështetur nga Komisioni Europian dhe vendet partnere, zoti Berisha foli për vilat, pallatet e Edi Ramës dhe qeveritarëve të tjerë, të cilët për të pushuar hetimin e tyre të nisur nga ILDKP shkarkuan në kundërshtim me Kushtetutën kryetaren e këtij institucioni.
“Gjithashtu ai njohu të pranishmit me dhunën ndaj opozitës dhe fushatën antiparlament të Edi Ramës vetëm e vetëm se opozita denoncon aty me fakte në çdo seancë lidhjet e rrezikshme me krimin dhe korrupsionin të qeveritarëve aktual. Në seancë merrnin pjesë presidentë, kryeministra, ministra nga vendet e rajonit dhe vende të tjera si dhe zyrtarë të lartë të NATO-s dhe Komisionit Europian” – njofton portali NOA.
