Sali Berisha ka ngritur gjithë PD-në në këmbë që t’i mbushin mendjen shqiptarëve se Donald Trump do t’ia heqë ‘non gratën’.
Mirëpo sot Berisha akuzoi dhëndrin e Trump se po përdoret nga Edi Rama përmes projektit në Sazan. Sipas Berishës, kjo e gjitha po ndodh për të blerë influenca politike, pra Rama përmes dhëndrit të blejë Trumpin.
“Prej të paktën që nga viti 2001 gjer sot, Sazani iu është ofruar biznesmenëve të huaj në mënyrë periodike. Kjo është oferta e radhës, të cilën pa diskutim Edi Rama e bëri për të blerë influenca politike.
Por, nëse oferta plotëson rregullat ligjore, ne kemi deklaruar se nuk kundërshtojmë ofertat që bazohen në respektimin e ligjeve dhe rregullave të vendit”, tha Berisha në një bashkëbisedim me ndjekësit në llogarinë e tij në Facebook.
Kujtojmë se në ishull do të zhvillohet projekti i një hoteli luksoz, pjesë e të cilit është edhe dhëdri i Donald Trump, Jared Kushner, i cili u shpall investitor strategjik.
Duke qenë se ishulli i Sazanit është në pronësi të Ministrisë së Mbrojtjes dhe pjesë e planit të përhapjes së ushtrisë, vendimi i Komitetit të Investimeve Strategjike është paraprirë nga një dekret i Presidentit që e ka nxjerr nga plani i përhapjes së FA këtë zonë.
Kushner nuk do të jetë i vetëm në këtë investim, pasi në vendim sqarohet se edhe shteti shqiptar do të jetë bashkëpjesëmarrjes në investim.
