Avokati i njohur Romeo Kara, theksoi se është të vënë ‘duart në kokë’ kur shikon se si ish-kryeministri Sali Berisha, i marrë i pandehur nga drejtësia e re është kthyer befas në një “dashnor” të flaktë për SPAK.
I ftuar në emisionin “Tirana Live” në ABC News, Kara u shpreh se sado probleme mund të kenë prokurorët dhe gjyqtarët e SPAK, ata janë sërish më të pastër se politikanët e të dyja kaheve politike.
“Të biem në nivelin që SPAK-un mbron Sali Berisha, kjo është për të vënë duart në kokë. Sado burra të këqij të jenë ata të SPAK, gjithsesi janë më të mirë se të politikës në të dyja krahët”, tha ai,.
Gjatë intervistës në studio, avokati pohoi se Sali Berisha asnjëherë nuk ka patur marrëdhënie korrekte me prokuroret dhe kryeprokurorët e vendit, madje i ka sulmuar sistematikisht.
Ai pohoi se Sali Berisha duhet të tregojë para shqiptarëve se me çfarë parash do ta paguajë ish-këshilltarin e Donald Trump, Chris LaCivita, i cili është pajtuar si strategjist i fushatës së Partisë Demokratike.
“Ai duhet të mbrojë veten. Ai të tregojë se me çfarë po e paguan atë, që ka ardhur nga Amerika, ish-këshilltarin e Trump. Ky [Sali Berisha] është personi, që e ka tmerr SPAK-un”, tha ai.
