“Nuk jam këtu për të diskutuar të shkuarën. 5 nëntori u dha përgjigje këtyre. Kjo është administratë që ka humbur”. Kështu u përgjigj kryetari i Partisë Demokratike, Sali Berisha kur u pyet nga gazetarët për deklaratën e ambasadës së SHBA mbi qëndrimin e SHBA për personat non grata.
“Kjo është administratë që ka humbur. Nuk jam këtu për të harxhuar kohë për të shkuarën. Duhet të më pyesni për të ardhmen. Po më pyetët për administratën që vjen, se për administratën që ikën, nuk besoj që ka mbetur gjë që nuk kam thënë para jush. Nuk rri të komentoj unë tani, të themi, çfarë t’i thuash, ajo ishte shkruar nga dora e Kimit, bile e kishte ndryshuar pak. Nuk mund të komentoj administratën që ikën”, u përgjigj Berisha.
Dy ditë më parë nëpërmjet një njoftimi në rrjetet sociale, e ngarkuara me punë e ambasadës amerikane, Nancy VanHorn tha se SHBA i qëndron pozicionit për personat e shpallur për korrupsion madhor, por njëkohësisht kërkon klimë politike gjithëpërfshirëse në parlament.
“Nxis të gjitha palët të angazhohen në mënyrë konstruktive në një proces politik që është i barabartë për të gjithë. Ne i qëndrojmë pozicionit tonë të kahershëm se nuk angazhohemi me individë të përcaktuar për përfshirje në korrupsion madhor”, tha ajo.
Ambasada amerikane zgjodhi të japë mesazhin e saj me nisjen e periudhës zgjedhore duke kërkuar krijimin e një mjedisi të barabartë për të gjithë në zgjedhje. Nancy VanHorn, deklaroi se gjatë muajve të fundit kishte zhvilluar disa takime me përfaqësues të opozitës shqiptare, duke vlerësuar pozitivisht ato.
Ky qëndrim i Ambasadës Amerikane vjen pak ditë pas edhe qeveria Britanike, i refuzoi Sali Berishës mundësinë e ankimit të non gratës.
