Ish-kryeministri Sali Berisha reagoi pas lajmit të konfirmuar nga qeveria se në Shqipëri ka dy raste me koronavirus. Berisha thotë se ky është një mashtrim. Sipas tij, në Firence të Italisë nuk ka koronavirus. Sipas tij, këto raste janë infektim brenda vendit.
DENONCIMI I BERISHES
Edvin Çekapi dhe Ndrikull Hajnia mashtrojnë shqiptarët!
Në Firence nuk ka asnjë rast me koronavirus!
Shpallin të importuar dy rastet me koronavirus të ardhur 10 ditë më parë nga Firence. Ndërkohë që edhe sot në Firence nuk ka asnjë rast me koronavirus dhe në Shqipëri janë të paktën 3 vdekje nga sëmundje infektive mushkërore superakute, për të cilat ekzistojnë të gjitha dyshimet se ishin vdekje nga koronavirusi të fshehura.
Kështu që ekziston çdo mundësi që rastet të jenë infektim brenda vendit.
Shtoj këtu se gjatë nje muaj janë bërë gjithsej 53 të dyshuarve analiza për koronavirus, ndërkohë që janë bërë më shumë konferenca shtypi trillimi dhe mashtrimi nga Ndrikull Hajnia dhe zëdhënësit e tjerë të Edvin Çekapit.
Dënoj me ashpërsinë më të madhe qëndrimin kriminal dhe të papërgjegjshëm të Edvin Çekapit dhe Ndrikull Hajnisë ndaj kësaj epidemie me vdekshmëri të lartë.
Këta të papërgjegjshëm vetëm sot ndërprenë fluturimet me Italinë e Veriut, ndërkohë që vetë Italia ka izoluar me ushtri ato zona dhjetëra ditë më parë.
Po kështu Shqipëria sot është i vetmi vend në botë me një qendër të vetme për analizën e koronavirusit. Ky është një krim i vërtetë shtetëror i bërë me PPP e Edvin Çekapit dhe ndrikull Hajnisë!
Përveç këtyre, për analizat për koronavirus nuk ka pasur dopio- kontroll çka e bën shumë të dyshimtë vërtetësine e tyre.
Së fundi, asnjë përgatitje serioze nuk është bërë për përballimin me sukses të epidemisë. Mungojnë për publikun maskat, dizinfektantë etj etj.
Ju bëj thirrje qytetarëve, pa rënë aspak në panik, të respektojnë rregullat tashmë të publikuara në media për mbrojtje vetjake nga infeksioni!
Harta që tregon situatën në Firence
Por sipas hartës së situatës me koronavirusin në Itali, edhe zona e Firences është e prekur nga Covid-19.
Sipas kësaj harte, në datën 8 mars 2020, në rajonin e Firences kanë rezultuar pozitivë me koronavirus 39 persona.
