Është e enjte dhe pavarësisht se nuk ka Parlament, Sali Berisha nuk mund të mungonte. Gjatë fjalës së tij të gjatë në “Forumin Shqiptar për Liri dhe Demokraci”, ish kryeministri i vendit e ka cilësuar qeverisjen e majtë si një organizatë kriminale që udhëhiqet nga interesa të pista personale. Duke përmendur emra konkretë, Berisha ka bërë një analogji mes banditëve dhe deputetit socialist Koço Kokëdhima.
“Kokëdhima, çfarë ka krimineli më shumë se ky? Ka marrë më shumë se 150 pagesa nga paratë publike që kur është bërë deputet i jugut… kur qarkullojnë të lirë Shullazi dhe Arben Frroku, se moralin e tyre e ndan Rama. Rinia dhe roli i saj është shumë i rëndësishëm. Vendi është në situatë kritike, qeveriset nga një organizatë kriminale, që vjedh me tendera e konçesione pasuritë publike”, tha Berisha.
Sali Berisha tha se nën sundimin e Ramës ka zero shanse për zgjedhje të lira në Shqipëri. Duke ju referuar protestës së 8 dhjetorit nga ana e opozitës, ish kryeministri theksoi se protesta ishte një uragan i revolucionit qytetar. Sipas Berishës, më 8 dhjetor u pa qartazi se qytetarët janë të zhgynjyer nga Rama dhe qeverisja e tij, siç dhe theksoi Berisha, më shumë sesa u zghënjye krahu i djathtë, pas humbjes së 2013.
“Mosbindja civile do të jetë leva e arkimedit për të larguar këtë qeveri. Beteja jonë duhe të jetë një betejë për mendjet dhe zemrat. Jam i bindur që kjo do të ndodhë. Krahu ynë është i zhgënjyer por jo në ndonjë shkallë… po sepse nuk kanë pritur ndonjë qeverisje nga Rama… por socialistët po, janë zhgënjyer thellë”-theksoi Berisha.
