Berisha kërkon votën në 11 maj: Do falim gjobat e dritave dhe ujit! Do u kthejmë paratë që janë vjedhur

Këtë të premte pasdite kreu i Partisë Demokratike Sali Berisha është ndalur në një takim me banorët dhe anëtarët e degës nr. 2 në Tiranë.

Ai e nisi fjalën e tij me akuza ndaj qeverisë duke thënë se kanë kryer korrupsion me tenderat e rrugëve.

“Për ndërtimin e djegësit të kryeqytetit taksat e shqiptarëve janë dhënë 130 mln euro dhe ai nuk ka gjurmë kund, as paratë, sepse kanë shkuar në kontot e Ramës dhe suitës së tij. Sot me një dorë, vetëm në Unazën e Tiranës, e kanë ndarë në 14 kontrata, ju garantoj që në botë një tenderim i tillë nuk mund të gjendet. Është ndarë në 14 kontrata sepse çdo km është ndërtuar më 17 mln euro”, tha Berisha.

Berisha premtoi se nëse fiton në 11 maj, do të luftojë korrupsionin dhe paratë do t’ua kthejë qytetarëve.

“Ne kemi të gjithë trashëgiminë, forcën dhe vullnetin t’i rikthejmë fort luftës kundër korrupsionit, vjedhjes së parave tuaja dhe do t’ua kthejmë juve. Do i kthejmë në rroga, pensione, shërbime. Pra pastrimi i shtëpisë është shtylla qendrore ku bazohet programi ynë”, tha Berisha.

“Pas 12 vitesh kërkon mandat tjetër, kërkon të pasurohet më shumë vetë, sojin e tij dhe oligarkët dhe t’u varfërojë ju. Ndaj 11 maji është ditë shpëtimi për Shqipërinë dhe shqiptarët”, shtoi më tej lideri i opozitës duke iu referuar Edi Ramës.

“Do ua gjejmë pasuritë në Shqipëri dhe ku i kanë dhe do të shiten për t’ua kthyer paratë shqiptarëve, do të përdoren për politika sociale”, tha Berisha.

Berisha tha se nëse do të vijë në pushtet do të bëjë amisti dhe se do të falen gjobat e dritave dhe ujit.

Këta ndërtojnë pallate dhe nuk paguajnë gjoba, kurse atë që ngre çatinë e tij në fshat e marrin dhe e rrasin në burg, është reale kjo që po them. Kjo merr fund, do falet çdo gjobë që është vendosur për dritat, për ujin, ndërtimet në fshatra në qytet, kamatat. Kamatat e marrin në mënyrë të paligjshme s’ka ligj, se ato janë falur njëherë.

Drejtori i OSHEE, ish-drejtori, merr dhe punëson qindra patronazhistë dhe pastaj vërsulet se si e si të marr gjoba, kamata e fatura false nga qytetarët, marrin fund këto, e kam deklaruar, do ketë amnisti për gjobat dhe për biznesin e vogël, jo vetëm për qytetarët”, tha ai.