Ish-kryeministri Sali Berisha tha se nëse PD vjen nesër në pushtet do të bëjë gjithçka, së bashku me institucionet europiane dhe amerikane, që të zhdukë, ato që i quan “pasoja katastrofale” të Reformës në Drejtësi.
“Nesër në pushtet me institucionet më të mira europiane edhe amerikane do bëjmë gjithçka të zhdukim sa më parë pasojat katastrofale të kësaj reforme të korruptuar. Të rikthejmë të drejtën e shqiptarëve për proces të ndershëm gjyqësor. Të rivendosim shtetin ligjor, sigurinë ligjore si kushte të të gjitha kushteve për të patur një shoqëri të lirë, një individ të lirë. Për të patur treg të lirë, për të patur investime, për të ecur në procesin e integrimit”.
Po ashtu, ai garantoi se shqiptarët dhe bizneset do të kenë taksat më të ulëta në Europë.
“Sot 50% e shqiptarëve lëngojnë në varfëri. Mjerimi ose varfëria janë rritur 3 ose 4 herë. Pagat, pensionet janë bërë qesharake. Me të drejtë, secili prej jush dhe çdo demokrat e demokrate shtron pyetjen: si do e ndryshoni ju këtë gjendje kaq të rëndë? Përgjigja është një dhe vetëm një: Ne këtë gjendje do e ndryshojmë dhe japim fund sepse do të ndezim motorët e entuziazmit të tregut. Ne që sollëm tregun e lirë. Mos harroni se 30 vite më parë ne vendosëm taksën më kryesore, taksën e vlerës së shtuar, të dytën më të ulëtën në botë. Jemi parti e taksave të ulëta. Garantoj shqiptarët dhe bizneset se Shqipëria do të jetë vendi i taksave më të ulëta në Europë. Jo vetëm kaq, por ky është vend i bekuar. Pasuritë përrallore do të shndërrohen në burime të fuqishme zhvillimi dhe të ardhura për shqiptarët”, tha Berisha.
/a.r
