Nga Mero Baze
Pas dorezimit të Lulzim Bashës, për të votuar reformën në drejtësi, ajo që bën përshtypje është se Sali Berisha po përpiqet ta përjetoj votën “pro” reformës, si triumf ndaj perëndimit.
Në deklaratën e tij, pas dorezimit të Bashës, Berisha ndryshe nga të tjerët, e vuri theksin tek fakti që “gjyqtarët do ti emërojnë shqiptarët” dhe jo të huajt.
Edhe pse e gjitha është një fjali spekulative, ajo që bën përshtypje, është fakti se Berisha ka vendosur të gëzohet si “antiperëndimor” në këtë betejë dhe jo si një politikan shqiptar që lufton për një drejtësi të balancuar.
E vërteta është se ndërkombëtarët nuk shmangen nga asnjë rol që kanë pasur në projektin e zonjës Nuland. Ata kanë veton e tyre për çdo listë të zezë që hartojnë, pasi lista e zezë e tyre, duhet të hidhet poshtë me 5/6 e anëtarëve të Komisionit Ad Hoc.
Por dhe sikur të ishte ndryshe, Shqipërisë nuk i takon të mburret se i ka thyer hundët Perëndimit. Berisha po e bën këtë me karshillëk, dhe po e bën për të inkriminuar mes të tjerash PD, si një parti antiperëndimore.
Pasi tentoi ta çonte Bashën në gijotinë dhe ta fuste në listën e zezë të SHBA, tani po përpiqet të paraqes gjithë PD si një repart muxhahedinësh, që po festojnë fitoren fallco mbi perëndimin. Dhe duket se e gjitha vjen nga zemërimi që nuk mban dot, ngaqë nuk ja doli ta mundte Perëndimin.
