Sali Berisha do të jetë kandidati i vetëm në garën për kryetar të Partisë Demokratike. Edhe pse në fillim u paraqitën si kandidatë edhe Mereme Sela dhe Vladimir Mulaj, ata janë skualifikuar nga Komisioni i Organizimit dhe Kontrollit të Operacioneve Elektorale (KOKOE) gjatë procesit të shqyrtimit të dokumentacionit.
Sipas vendimit të KOKOE, skualifikimi i tyre erdhi pasi nuk përmbushnin kriteret statutore të përcaktuara nga partia. Konkretisht, u vlerësua se kandidatëve u mungonte profili i lartë politik si dhe eksperienca drejtuese në nivele elektorale kombëtare dhe rajonale.
“Nga aplikimet e shqyrtuara rezulton se: Z. Sali BERISHA, anëtar i Partisë Demokratike, ka paraqitur kërkesë për kandidim, së bashku me dokumentacionin përkatës, sipas përcaktimeve të pikës 2 të vendimit nr.35/1 datë 18.03.2016 të KOKOE. Dokumentacioni është i plotë dhe i rregullt dhe KOKOE në mënyrë unanime vlerëson se z. Sali BERISHA plotëson të gjitha kriteret statutore si dhe ato të përcaktuara në pikën 4 të vendimit nr.35/1 datë 18.03.2016 të KOKOE.
Zj. Mereme SELA, anëtare e Partisë Demokratike, ka paraqitur kërkesë për kandidim, së bashku me dokumentacionin përkatës, sipas përcaktimeve të pikës 2 të vendimit nr.35/1 date 18.03.2016 të KOKOF. Dokumentacioni është i rregullt, por KOKOE në mënyrë unanime vlerëson se zj. Mereme SELLA nuk plotëson kriteret statutore si dhe ato të përcaktuara në pikën 4 të vendimit nr.35/1 datë 18.03.2016 të KOKОЕ. Konkretisht kandidatja pavarësisht se është anëtare e PD, nuk plotëson kriterin e figurës me profil shumë të lartë publik dhe politik, si dhe atë të eksperiencës drejtuese elektorale ne nivel kombëtar apo rajonal;
Z. Vladimir MULAJ, anëtar i Partisë Demokratike, ka paraqitur kërkesë për kandidim, së bashku me dokumentacionin përkatës, sipas përcaktimeve të pikës 2 të vendimit nr.35/1 datë 18.03.2016 të KOKOE. Dokumentacioni është i plotë dhe i rregullt, por KOKOE në mënyrë unanime vlerëson se z. Vladimir MULAJ nuk plotëson kriteret statutore si dhe ato të përcaktuara në pikën 4 të vendimit nr.35/1 datë 18.03.2016 të KOKOE. Konkretisht kandidati pavarësisht se është anëtar i PD nuk plotëson kriterin e figurës me profil shumë të lartë publik dhe politik, si dhe atë të eksperiencës drejtuese elektorale ne nivel kombëtar apo rajonal”, thuhet në vendimin e KOKOE.
Në vendimin e KOKOE thuhet se vetëm 3 kandidatët, Sali Berisha, Mereme Sela dhe Vladimir Mulaj arritën të plotësonin kriteret me dorëzimin e dokumentacionit për kreun e PD, ndërsa kërkesat e tjera u skualifikuan “se nuk plotësojnë kushtin e paraqitjes nga anëtar të PDSH-së, nuk mund të trajtohen nga KOKOE dhe as nga ndonjë organ tjetër i PDSH sipas Statutit të Partisë”.
Kandidatura e Sali Berishës do t’i propozohet Kryesisë së Partisë Demokratike, e cila pritet të mblidhet më 23 maj për të shqyrtuar më tej procesin. Në këto kushte, gara për drejtimin e Partisë Demokratike mbetet me një kandidat të vetëm ku pritet rikonfirmimi i Berishës, liderit historik të PD.
