Sipas dokumenteve të kohës, të publikuara së fundmi del se si ish-Presidenti Sali Berisha u hapi dyert të ashtuquajturave ‘organizata bamirëse’ islamike në Shqipëri, nën petkun e të cilave fshiheshin terroristë, që më vonë u bënë të njohur botërisht si pjesëtarë të organizatës famëkeqe të Al Kaedës të komanduar nga Osama Bin Laden.
Dikush mund të thotë që Berisha nuk e dinte çfarë fshihej pas tyre.
‘DITA’ disponon një dokument që sugjeron të kundërtën. Është një letër e klasifikuar sekret mes ish-ambasadorit Ferit Hoti dhe ish-Presidentit Berisha.
Provon që të paktën që në 1995, Berisha dhe ish-shërbimi sekret shqiptar ishin në dijeni çfarë përfaqësonin “bamirësit”
Letra në fjalë është firmosur nga ish-ambasadori i Shqipërisë, në Kuala Lumpur, kryeqytet i Malajzisë, Ferit Hoti dhe ka informacione të klasifikuara si ‘Highly clasified’ (Tepër sekret).
Hoti ia ka drejtuar Presidentit të asaj kohe Sali Berisha më 15 maj 1995. Berisha nga ana e tij, pasi e ka lexuar, ka vënë një shënim me dorë mbi të ku shkruan: “T’i kalojë B.Gazidedes ky informacion”.
Në këtë informacion merret vesh se grupet ekstremiste islamike mbanin lidhje me biznesmenin arab Mohamad Jamal Khalifa, dhëndër i Osama Laden. Khalifa ishte i dyshuari kryesor ndër të tjera edhe për komplotin për të hedhur në erë një transpacifik që fluturonte nga Los Anxhelesi në Hong Kong.
Një vit më parë Khalifa ishte dënuar në mungesë me burgim të përjetshëm nga një gjykatë jordaneze.
Disa vite më vonë, vjehrri i Khalifës do të merrte përsipër autorësinë e masakrës së 11 shtatorit 2001, kundër Shteteve të Bashkuara. Këta komandonin edhe vatrën e terroristëve që vepronte në Shqipëri.
Informacioni vinte nga një vend shume mik i Shqipërisë në atë kohë, si Malajzia.
Po si u veprua më pas? Ç’u bë me faksin e ambasadorit Hoti? Si reagoi Gazidede pas informacionit që i përcolli Berisha?
Këtyre pyetjeve u përgjigjet vetë vijueshmëria e ngjarjeve me këtë temë në muajt dhe vitet pasardhës. Këta ‘bamirës’ vazhduan të qëndronin në vendin tonë edhe për shumë vjet të tjerë të pa shqetësuar nga shteti shqiptar.
U dëbuan nga Shqipëria vetëm pas 11 Shtatorit 2001, kur në pushtet nuk ishte më zoti Berisha.
Gjatë disa botimeve në 2013 në një seri artikujsh kemi analizuar rolin që luajti në vendin tonë biznesmeni jordanez Abdul Latif Saleh.
Ish shefi i Shërbimit Informativ, Fatos Klosi, deklaroi në DITA se Salehu luante rolin e ndërmjetësit mes Berishës dhe botës islamike.
Sipas Klosit, ai ishte me një mision të dyfishtë në vendin tonë dhe sipas informacioneve të shërbimeve sekrete partnere, ai bënte pjesë në grupet terroriste islamike, pararendëse të Al Kaedës / DITA
Letra e ambasadorit Hoti botuar sot në DITA
AMBASADA E REPUBLIKËS SË SHQIPËRISË
KUALA LUMPUR
Nr. 103/95
PRESIDENTIT TË REPUBLIKËS SË SHQIPËRISË
SH.T. SALI BERISHA
INFORMACION
1. Sipas të dhënave ‘Higly classified’ të inteligjent servilit filipinas, Iraku, Jordania, Turqia, Rusia, Emiratet e Bashkuara, Rumania, Libani, Hollanda, Maroku, Shqipëria, Siria dhe Pakistani janë vatra të grupeve ekstremiste që mbajnë lidhje me biznesmenin arab Mohammed Jamal Khalifa. Sekretari i Punëve të Brendshme të Filipineve, Rafael Alunan, ka thënë që Khalifa, ka luajtur rol të madh në prapaskenën e aktit terrorist të 4 prillit 1995 në qytetin Mendanu të Ipil-it, duke shkaktuar vdekjen e 53 vetëve. Autoritetet amerikane besojnë se Khalifa, dhëndëri i bilionerit afgan, Mujahideen Osama Laden, ka qenë figura kyçe në aktin e aplikimit të eksplozivit në Qendrën Tregtare Botërore dhe gjithashtu pjesëmarrës në komplotin e kurdisur për të hedhur në erë traspacifikun që fluturonte nga Los Anxhelosi në Hong Kong. Vitin e kaluar, Khalifa, është dënuar në mungesë me burgim të përjetshëm edhe nga një gjykatë jordaneze. Sekretari i Punëve të Brendshme i Filipineve beson gjithashtu se Khalifa ka patur lidhje me 6 arabë të arrestuar më 1 prill 1995 në veri të Maniles si terrorist. Ai mendon se këta terroristë kanë lidhje me Ramzi Ahmed Yousef dhe Hakim Murat, të akuzuar së fundi në Nju Jork si pjesëmarrës në komplotin për hedhjen në erë të transpacifikut të sipërpërmendur, Los Anxhelos-Hong Kong. Këto ishin një pjesë e kufizuar e lojtarëve që autoritetet filipinase kanë deklaruar si me aktivitet për përhapjen e frymës ekstremiste në shtetet që kanë komunitete myslimane. Të gjithë këta terroristë përfundojnë të bashkuar tek Abu Savaff (Sëord of Justice) që ka lëshuar hijen e zezë të veprimeve të saja edhe në Filipine….
Ambasadori Ferit Hoti
Kuala Lumpur, më 15 maj 1995
