Sali Berisha ka komentuar sot dëshminë e mjekes kardiologe Margarita Kostaqi, e cila prentendonte se iu shkatërrua jeta pikërisht prej tij.
Çifti Margarita dhe Milto Kostaqi u dëbuan në Kavajë pas vdekjes së ish-kryeministrit Mehmet Shehu, pasi Milto kishte shërbyer si mjek i Shehut. Sipas Margaritës, Berisha ishte shumë i zellshëm në mbledhjet kundër saj.
Vetë kardiologia pohon në vitin 2010 se “Ishim shokë me Berishën, tani e kam shumë frikë”.
Por Berisha sot ka dhënë një përgjigje të dyshimtë. Ai u shpreh se në Rogner e ka përqafuar një grua, duke thënë se ajo ishte pikërisht Margarita. Për ta bërë më të besueshme, Berisha u shpreh se ka qenë së bashku me gazetarin Fevziu kur kjo grua ka ardhur pranë tij.
“Sa i përket shoqes time Margarita Kostaqi, unë e kam treguar që ajo më ka përqafuar në publik. E ka përmendur dhe Edi Rama në Parlament duke më thënë se kam persekutuar një shoqe. Margarita Kostaqi dhe i shoqi janë dëbuar pas vdekjes së Mehmet Shehut. Të gjitha të tjerat janë trillim sepse unë sekretar partie kam qenë në vitin 1979” – tha Berisha.
/javanews/a.r
