Juristi Romeo Kara dje me anë të një statusi në rrjetin e tij social Facebook ka komentuar sulmet e ish-kryeministrit Sali Berisha ndaj kreut aktual të PD, Lulzim Basha. Juristi tha se Berisha në mënyrën më të paturp po nxjerr vrer dhe mllef ndaj Bashës vetëm sepse ai nuk pranoi të jepte dorëheqjen nga partia kur iu kërkua përjashtimi i ish-kryeministrit nga Grupi Parlamentar i PD. Sipas tij, fakti që Basha nuk u bë theror për Berishën është gjynahu i tij më i madh.
“Poshtërsia politike e tij do të mbetet e vetmja cilësi, me të cilën Berisha do të kujtohet në të ardhmen. Qëllimisht dhe neveritshëm, ai ndan Anthony Blinken nga pozicioni i Sekretarit të Departamentit të Shtetit dhe Yuri Kim nga ai i ambasadores së SHBA. Berishën nuk e shpalli “non grata” Yuri Kim, por SHBA, të cilët janë jo vetëm aleati ynë i vetëm strategjik dhe i padiskutueshëm, por edhe garanti i këtij sistemi politik. Berisha paturpësisht vjell vrer e mllef përkundër ish-beniaminit të tij Basha, vetëm për arsyen se, ai nuk pranoi të bëhej theror për të, duke dhënë dorëheqjen si kryetar partie, kur iu kërkua përjashtimi i tij, nga grupi parlamentar i PD-së. Ky është “gjynahu” i vetëm i Bashës”, tha ai.
Juristi u shpreh se Berisha është përfundimisht politikani më i poshtër i epokës pas komunizmit. Ai deklaroi se Berisha ka si tipar dallues antiheroizmin pasi duke këmbëngulur kërkon që të tjerët të sakrifikojnë për të. Sipas juristit, Berisha nuk ka sakrifikuar kurrë në funksion të vendit.
“Berisha kishte parashikuar rezistence dhe dorëheqje nga Basha, si dhe çdo kryetar, që do ta pasonte atë, për t’i shkuar deri në fund shpërdorimit vetjak, që ai do t’i bënte PD-se, në një karshillëk të tillë “vetëvrasës” me SHBA-të. Pikërisht ky është antiheroizmi si tipar dallues i Berishës dhe që e përcakton përfundimisht atë, si politikanin më të poshtër të kësaj epoke post komunizëm. Berisha po kërkon hapur dhe me këmbëngulje sakrifikimin e të tjerëve për të. Berisha nuk ka qenë hero. Kurrë nuk mund të gjejmë një sakrifikim sado të vogël në funksion të vendit të tij”, u shpreh ai.
/a.r
