Një ditë më parë, Sali Berisha denoncoi zhdukjen e një 34-vjeçari me të cilin familja ka humbur kontaktet prej disa ditësh.
‘Qytetari Dixhital’ i shkruajti ish-kryeministrit Sali Berisha dhe akuzonte policinë se nuk ka bërë asgjë për të gjetur 34-vjeçarin Keisi Elion Hysa.
“Zoti Berisha, jam një qytetar nga Laçi me emrin Asllan Hysa. kam një problem të jashtëzakonshëm. Më datë 5, ora 09:30 ka humbur kontaktet djali i vëllait Keisi Eljon Hysa në zonën e Niklës në Fushë Krujë. Dyshoj se edhe mund të jetë vrarë dhe policia nuk po reagon fare që nga data 6 Korrik që është bërë denoncimi në komisariatin e Laçit”, shkruante xhaxhai i të riut.
Por, pas publikimit të këtij mesazhi, ka ardhur edhe reagimi i Policisë së Shtetit.
Policia sqaron se Hysa është në kërkim nga policia pasi është i dyshuar për një vrasje.
Sipas policisë “u referuan materialet proceduriale në Prokurorinë e Rrethit Gjyqësor Kurbin, për humbjen e shtetasit K. H., pasi ka bërë kallëzim shtetasi S.H., 63 vjeç, banues në Laç, ku pretendon se kanë humbur kontaktet me djalin”.
Më tej, në komunikatën zyrtare policia sqaron se për 34-vjeçarin Gjykata e Sarandës ka caktuar masën e sigurisë “arrest me burg” për veprat penale “Vrasja me paramendim e kryer në bashkëpunim” dhe “Armëmbajtja pa leje”.
Ky shtetas rezulton se ka qenë në kërkim prej datës 17 Korrik të vitit 2015 kur dhe është dhënë masa ndaj tij për akuzën e vrasjes. /b.d
