Kreu i Partisë Demokratike, Sali Berisha ka dënuar sulmin e Iranit ndaj Azerbajxhanit ditën e sotme. Ai tha se sulmet e Iranit nuk janë vetëm një kërcënim për Azerbajxhanin, por edhe për stabilitetin e gjithë rajonit të Kaukazit dhe Lindjes së Mesme.
Kreu i PD theksoi gjithashtu rëndësinë e forcimit të marrëdhënieve të bashkëpunimit mes Shqipërisë dhe Azerbajxhanit në fusha të ndryshme, duke përfshirë diplomacinë, ekonominë dhe mbrojtjen e të drejtave të minoriteteve. Ai bëri thirrje për një reagim të përbashkët ndërkombëtar që të shmangë përshkallëzimin e konfliktit dhe të garantojë sigurinë rajonale.
Berisha: Duke dënuar me forcën më të madhe sulmet e regjimit të Ajatollahëve ndaj të gjithë fqinjëve të saj, i bëj thirrje Azerbajxhanit, duke i shprehur të gjithë solidaritetin e PD dhe timin të bëjnë çdo gjë për çlirimin e dhjetëra milionë azerëve që prej dekadash vuajnë në tiraninë e Ajatollahëve.
Irani duhet të marrë përgjigje përfundimtare. Janë mbi 50 përqind e popullatës, të cilët nuk janë persë, por janë të minoriteteve të tjera. Në këto minoritete, azerët janë më kryesorët. Janë rreth 30 milionë. Uroj dhe shpresoj që edhe bota të ndihmojë çlirimin e tyre sepse regjimi i bazuar në teokraci është një regjim më i rrezikshmi sot.
Berisha shtoi se kjo situatë kërkon një veprim të vendosur nga komuniteti ndërkombëtar. Kreu i PD u shpreh se operacioni që ka nisur duhet të përfundojë patjetër me mposhtjen e regjimit, dhe se vetëm pasi iranianët të jenë të lirë, ata mund të vendosin për fatin e tyre.
Berisha: Së dyti, bëj thirrje që këto operacione ndaj Iranit të vazhdojnë gjer në përmbysjen e plotë. Është e gabuar dhe e padrejtë të pritet nga iranianët që të ngrihen dhe të dalin në rrugë në një kohë kur ata i presin breshëritë e mitralozave dhe topave të regjimit të Ajatollahëve. Ky operacioni që ka nisur duhet të sosë me çdo kusht me mposhtjen me çdo çmim të atij regjimi dhe pastaj iranianët në liri do vendosin për fatin e tyre.
Ky qëndrim vjen në një kohë kur tensionet në rajon janë rritur ndjeshëm, dhe konflikti në Lindjen e Mesme rrezikon të zgjerohet.
