Në seancën plenare të kësaj të enjteje, 16 prill, kreu i Partisë Demokratike, Sali Berisha akuzoi mazhorancën që nuk po lejon ngritjen e komisioneve hetimore parlamentare.
“Parlamenti shqiptar nuk mbron më interesat e qytetarëve shqiptar por përdoret kundër qytetarëve.
Për herë të parë në gjithë ekzistencën e parlamentit, mandatet e krimit nuk lejojnë ngritjen e komisioneve hetimore parlamentare”, tha Berisha.
Më tej kryedemokrati bëri akuza të forta për Call Center-at në Shqipëri, ku tha se grabisin pensionistët në qytete të ndryshme të botës dhe që ato po mbrohen nga shteti.
Berisha akuzoi gjithashtu se shefat e komisariateve marrin nga 5 mijë euro në muaj nga Call Center-at.
“Edhe sot që po flasim në qytetet e Shqipërisë zhvillohet një nga veprimtaritë më të gjera kriminale.
Këto ditë në qytetet e Shqipërisë me qindra e qindra të ashtuquajtur Call Center-a vjedhin ditë e natë pensionistët e vendeve që kanë kontribute të jashtëzakonshme. Që kanë kontribuar miliarda në këtë vend.
Salla krimi të mbrojtura nga shteti mashtrojnë dhe i grabisin pensionistëve pensionin në Itali, Gjermani, Spanjë në një aktivitet të mbrojtur nga shteti. Nga polici tek niveli më i lartë janë mburojë. Përfshihen nga shefi i komisariatit, që merr 5 mijë euro në muaj nga Call Center-i”, tha Berisha.
