Ish-kryeministri Sali Berisha, nga ‘Foltorja’ e radhës në Burrel deklaroi këtë mbrëmje se Edi Rama merr më 11 dhjetor përgjigjen më të hidhur që mund të ketë marrë ndokush këto 30 vite. Kujtojmë se Berisha ka thirrur Kuvendin Kombëtar të PD më 11 dhjetor.
Ish-lideri demokrat u shpreh se “pengu i Ramës Lulzim Basha i cili është futur në lojën më të rrezikshme 30 vitet e fundit në atentat ndaj lirisë së shqiptarëve dhe pluralizmit politik, do të arkivohet në arkivat e turpit të historisë së këtij vendi”.
“Mafia e George Soros e cila bëri gjithçka për të shtruar opozitën shqiptare në një ministri të narkoshtetit, do të dështojë, dhe këtë dështim e mirëpret Shqipëria, forcat konservatore në Shtetet e Bashkuara dhe kudo në botë.
Kanë qenë vite të vështira, ku ju keni derdhur lumenj djerse, ku ju u varfëruat në mënyrën më të shpejtë që mund të ndodhë, fëmijët tuaj u larguan masivisht nga Shqipëria, vite të cilat krimi dhe droga bëjnë ligjin në rrugë, qytet e fshat, bëjnë ligjin në parlament, qeveri e kudo, kërcënojnë përditë jetë njerëzish, prona dhe vende pune.
Shqipëria kaloi nga një rekord i zi në një tjetër, u bë delja e zezë e ballkanit dhe në Europë. Opozita për shkak të një dështaku, faktikisht, de fakto u shndërrua në një aleat të pashpallur në narkoshtetit.
Në 8 vite, Shqipëria, shqiptarët, kaluan nga qytetarët me rrogën mesatare më të lartë në rajon, në qytetarët me rrogën më të ulët në rajon, 30 për qind më të ulët se në Kosovë.
Kafshata e gojës kushton në Shqipëri 80 herë më shumë se në Bashkimin Europian. Tenderat sekretë janë rritur me 15 herë, kilometri në fushë, kushton shumë më shumë se çka kushtuar kilometri i tunelit në Kalimash dhe Qafë Krrabë.
Ka një vjedhje të taksave tuaja. Nëse Rama ekzekuton shpresën çdo ditë, Lulzim Basha është bërë varrmihësi i saj, sepse nuk ngjall shpresë.”-tha Berisha./m.j
