Lideri historik i Partisë Demokratike, Sali Berisha ka akuzuar kryedemokratin Lulzim Basha se ka pasur dijeni, madje dhe ka ndihmuar kryeministrin Edi Rama për shpalljen e tij “non grata” nga Departamenti Amerikan i Shtetit.
Në fjalën e tij gjatë një interviste për “A2CNN”, Berisha tha se Basha ka ndihmuar Ramën, pasi e dinte që po të humbiste zgjedhjet parlamentare të 25 prillit, ai nuk do ta kursente.
“Nëse Basha do të më gënjente mua siç gënjen sot, nuk po them se shkarkohej për 4 minuta, por për një kohë rekord shkarkohej. E them sot, Basha u mor bashkë me Edi Ramën për shpalljen time “non grata”. E dinte që nëse do të humbte dhe këto zgjedhjet, Sali Berisha nuk do ta kursente në mënyrë absolute,”-tha Berisha duke theksuar edhe rolin e Bashës.
“T’i besosh Lulzim Bashës, është të gënjesh veten tënde. Çdo gjë që thotë ai, nuk mund të merret për të vërtetë. Njerëzit që kanë përgënjeshtruar Bashën janë njerëz seriozë dhe njerëz që kanë pasur kontakte me ambasadoren Yuri Kim”, shtoi Berisha.
