Ish-kryeministri Sali Berisha, ashtu siç është bërë tashmë e udhës sa herë ka Parlament, ka hedhur akuza ndaj qeverisë dhe punës së bërë prej saj. Nga foltorja e Kuvendit, Berisha në mbyllje të sesionit tha se ky vit parlamentar u dominuar nga krimi.
Teksa risolli në vëmendje ngjarjet e ndodhura që prej shtatorit, duke nisur me çështjen “Doshi”, më pas “Frroku”, me laboratorin e Xibrakës e deri tek dekriminalizimi, Berisha madje akuzoi edhe vëllain e kryeministrit Edi Rama.
Sipas Berishës, Olsi Rama qarkullon nën shoqërinë e një personi me rekorde kriminale, që ai e cilëson si kapon e bandës “Hakmarrja për Drejtësi”.
“Ky vit parlamentar, si asnjë parlament tjetër në botë, u dominua nga krimi dhe nga bota e krimit. Nisi me aferën Meta-Doshi në fillim të shtatorit. Vazhdoi me vilunin e Mark Frrokut, vazhdoi me Kostandinin e partisë. Në dhjetor policia ndalon Mark Frrokun në Laprakë, Edi Rama urdhëron lirimin e tij pasi kishte në makinë kryetrafikantin Pllana. Në janar vjen kërkesa nga Brukseli për Mark Frrokun, fshihet kërkesa për 3 muaj. E kur doli, Saimir Shullazi arreston si egërsirë dy punonjës të Interpolit, një zonjë dhe një oficer, sepse ata kishin njoftuar. I pruri vetë Belgjika. Ju thatë nuk ka ardhur asgjë, ai djalë që arrestuat në mesnatë tha ka ardhur. Uzina e Xiprakës. Hakmarrja për drejtësi e ka marrë me kërcënimet më të egra Edi Ramën në telefon. Hajde marrim tabulatet. Por trusti i hakmarrjes janë në dispozicion të Ramës. Ka punësuar edhe familjen. Të jap unë datat kur Olsi qarkullon me Gentjan Hodaj, që është kryesori i hakmarrjes. Tjetër, banda e tritolit. Ka marrë 27 shpirtra ai. U bë marrëveshje për dekriminalizimin. E shtytë dhe emëruat në krye me dhjetëra persona të inkriminuar dhe të dënuar”, tha Berisha.
