Ka disa ditë që ka shpërthyer debati për ftesën që i është bërë këngëtarit kroato-serb Goran Gregoviç që të këndojë në Korçë, në festën e birrës.
Janë aktivizuar ‘patriotët’ këtej dhe andej kufirit për të akuzuar kryeministrin Edi Rama dhe qeverinë e socialistëve si tradhëtarë, pavarësisht se ftesa është bërë nhë pushteti vendor dhe kompania private.
Personazhe të njohura të politikës, artit, kulturës dhe gazetarisë janë përfshirë në një debat që duket se nuk ka fund që në qendër ka këngën “Kallashnikov”, ndonëse askush nuk merr mundimin të vendosë dhe tekstin e këngës që nuk ka asnjë fjalë nga ato që pretendohen.
Nuk kishte si ti mungonte këtij debati ish kreu i bashkisë së Kamzës, njëherësh dhe deputet i zgjedhur në qarkun e Dibrës Xhelal Mziu.
Pasi kishte lëshuar thirrjen para 25 prillit për të vrarë këdo që dyshohej se mund të blinte vota, tashmë ka ardhur radha për të “mbyllur” dhe debati e shpërthyer për Bregoviç.
Mziu përmes një statusi në rrjetin social propozon që, në hapjen e festës së birrës të këndohet kënga “O zambaku i Prizrenit”. Nuk dihet ende nëse do të merret parasysh propozimi i Mziut, i cili mund të ndikojë në zbutjen e klimës me opozitën, pasi ish kreu i Kamzës është i rëndësishëm për Bashën, aq sa bën dhe pritjet në emër të tij në selinë qëndrore buzë Lanës.
Postimi i plotë i Xhelal Mziut:
Festivali i birrës Korça, do kishte shumë vlerë po të hapej me këngën “O zambaku i Prizrenit” e artistit të madh, këngëtarit të njohur kosovar Esat Bicurri, në kujtim të masakrës serbe, por dhe 22 vjetorit të vdekjes së tij nga paramilitarët Serb!
Ai, u ekzekutua nga forcat paramilitare serbe më 7 maj të 1999 si mijëra kosovarë të tjerë, kufoma e tij u gjet dhe u rivarros në vitin 2004.
Këngët e tij konsiderohen perla të muzikës popullore shqiptare dhe janë shumë aktuale dhe sot.
Disa nga këngët e tij, kënga fituese me “Okarinë të Artë” në “Akordet e Kosovës” – “E kujtoj atë takim?”, “Eja e bardha verë”, “Një lulishte me trëndafila”, “S’ka më të bukur se pranvera”, e shumë këngë të tjera.
Esat Bicurri botoi dy libra të cilat quheshin: “Një këllëf me ar ta çova” dhe tjera, “Ahengjet Gjakovare në shekuj”
Do ti jepte vlerë këtij festivali, jo vetëm kënga e tij, por dhe kujtesa e masakrës Serbe tek vëllezërit tanë Kosovar!/m.j\
