Një studente në Tiranë është dënuar nga Gjykata me 40 orë punë të detyruar për interes publik, pas disa “trazirave” që ka shkaktuar në Urgjencën e QSUT-së.
Bëhet fjalë për një ngjarje të ndodhur më 5 prill të këtij viti, ndërsa vendimi përfundimtar nga Gjykata e Tiranës për dënimin e studentes është dhënë më 17 tetor 2017.
Sipas vendimit të Gjykatës, bëhet fjalë për një episod të pakëndshëm në mesnatë, në Urgjencën e QSUT. E pandehura A.P. kishte dalë me dy shoqet e saj dhe në gjendje të dehur ka shkuar në QSUT, pasi njëra prej mikeshave ishte helmuar nga konsumimi i tepërt i pijeve alkoolike.
Teksa shoqja e saj po merrte mjekimin e nevojshëm, në gjendje të dehur, A.P. ka nisur të debatojë me mjekun toksikolog. Sipas dosjes së Prokurorisë, A.P. i ka kërkuar disa peceta mjekut, por ky i fundit i ka thënë se nuk kishte me vete. Në atë moment, ka nisur një debat mes tyre dhe mjeku është detyruar të njoftojë Policinë, pasi A.P. po shkaktonte shumë zhurmë në repartin e Urgjencës.
Menjëherë, në vendngjarje kanë shkuar dy efektive të Policisë së Tiranës. Njëra prej tyre i ka kërkuar të pandehurës që të largohej nga reparti, pasi po shkaktonte shumë zhurmë. Por A.P. nuk iu bind urdhrit të Policisë dhe ka vazhduar të debatojë me mjekun. Ajo, madje, i është kthyer edhe efektives së Policisë, duke e shtyrë dhe duke i thyer kamerën që ajo mbante në trup.
Punonjësja e Policisë është detyruar që të kërkojë përforcime dhe menjëherë i kanë ardhur në ndihmë kolegët, të cilët kanë arrestuar studenten A.P. Për të, Policia e Tiranës nisi procedim penal për “mosbindje të urdhrit të punonjësit të Policisë dhe Rendit Publik”. Në gjykatë, studentja e ka pranuar fajin dhe konsumimin e veprës penale, për të cilën akuzohej.
Ajo ka kërkuar dënim sa më të ulët dhe gjykim të shkurtuar. Gjithashtu, përmes avokates, A.P. ka kërkuar që Gjykata të marrë parasysh edhe statusin e saj, si studente në Universitetin e Tiranës.
Në përfundim, Gjykata e dënoi atë me 1 muaj burgim, duke ia konvertuar burgun në 40 orë punë të detyrueshme me interes publik, për shkak edhe të statusit të saj, në mënyrë që të mos ndërpresë studimet. Vetë studentja e pranoi vendimin e Gjykatës dhe nuk e apeloi atë./Panorama/b.d
