I moshuari jep me fajde 70 milionë lekë të të birit emigrant. Por dy vite më pas, ai denoncon në polici se është mashtruar nga një i njohuri i tij, i cili veçse nuk po i kthente mbrapsht shumën e dhënë, i kishte dalë hasha për to. Ndodhur në këto kushte, 78- vjeçari me inicialet A.M. i është drejtuar Policisë së Beratit për ndihmë. Sipas deklaratës së dhënë prej tij, gjithçka ka nisur në vitin 2015. Në mirëbesim, ai kishte vënë në dijeni një të njohurin e tij, shtetasin me iniciale G.T., 53 vjeç, se mbante në shtëpi gjithë kursimet e fëmijëve të tij emigrantë.
Pas kësaj, 53-vjeçari kishte nisur ta takonte thuajse çdo ditë të moshuarin deri sa arriti ta bënte “shok” dhe të fitonte besimin e tij.“Unë i thashë në mirëbesim se kisha në shtëpi 70 milionë lekë të vjetër. Janë lekët që fëmijët e mi i kanë fituar me djersë në emigracion. Sapo i thashë shumën e parave, G.T. nisi të takohej thuajse çdo ditë me mua.Dilnim, pinim kafe. Derisa një ditë ai më kërkoi fillimisht një shumë parash që t’ia jepja borxh. Më pas më kërkoi t’i jepja një tjetër shumë me interes, pasi donte të investonte në ndërtim. Derisa m’i mori të gjitha, dhe më pas kur ia kërkova, më tha se nuk ia kisha dhënë”, është shprehur në Policinë e Beratit 78-vjeçari, shkruan “Panorama”.
Menjëherë pas denoncimit të tij, policia ka nisur hetimin në gjendje të lirë për personin e denoncuar.“Ka nisur procedimi penal në gjendje të lirë për shtetasin G.T., 53 vjeç, banues në Berat, pasi dyshohet se gjatë vitit 2015 i ka përvetësuar nëpërmjet mashtrimit shumën prej 700 0000 lekë, shtetasit A.M., 78 vjeç, banues në Berat. Materialet i kaluan Prokurorisë së Rrethit Gjyqësor Berat, për veprën penale ‘mashtrim’, parashikuar nga neni 143/2 i Kodit Penal”, thuhej në njoftimin e Policisë së Beratit.Tashmë do të merret në pyetje personi i dyshuar. Në sajë të pretendimeve të të moshuarit, paratë janë dhënë në mirëbesim dhe nuk rezulton që të kenë nënshkruar ndonjë deklaratë noteriale për paratë e dhëna. /ma.me
