Kryeministrit Edi Rama ka vizituar sot një pikë grumbullimi të produkteve bujqësore në fshatin Kutalli të Beratit. Kjo është një pikë grumbullimi, përpunimi, konservimi si dhe shitjeje e produkteve bujqësore, blegtorale, fruta perime, fidanë etj në tregjet ndërkombëtare.
Lorenc Hatija, drejtuesi i firmës u shpreh optimist për ndihmën e përfituar nga fondet mbështetëse. Ai sqaroi se numri i të punësuarve indirekt ka arritur në 2700 persona.
“Nga tetori 2015 kemi kaluar në 3000 tonë. Tani kemi mbidyfishim në mall dhe në të gjitha. Nga fillimi i 2015, që kishim rreth 3000 tonë, tani e kemi 7-8 mijë ton vetëm eksport, 100 % eksport.” u shpreh Hatija.
Në bisedë me të Kryeministri Edi Rama, ai tha se programet e ndihmës financiare të mundësuara nga qeveria, garantojnë mbështetjen më të madhe që i është dhënë zhvillimit të prodhimit bujqësor, eksporteve dhe punësimit njëkohësisht.
Kryeministri inkurajoi edhe njëherë fermerët që për të mirën e tyre financiare e për të përfituar sa më shumë nga skemat e ndihmës, të pajisen me NIPT.
“Ne kemi bërë një sakrificë buxhetore, në kuptimin e përgjithshëm të buxhetit, duke vazhduar të rimbursojmë 20% të prodhimit, në mënyrë që të nxisim formalizmin dhe qoftë për ju, qoftë për të gjithë ata që prodhojnë në fushë, është shumë e rëndësishme që të jenë të formalizuar, në mënyrë që të përfitojnë 20% e rimbursimit. Ata që kanë marrë NIPTI-n përfitojnë shumë më tepër se më parë”, tha Rama.
