“Ndryshimet e fundit dhe unifikimi i praktikës nga Gjykata e Lartë për masën e sigurisë “arrest në burg” pritet të ndikojnë drejtpërdrejt në qasjen e gjykatave ndaj kësaj mase”, kështu ka deklaruar avokati idajet Beqiri në emisionin “3D”.
Sipas Beqirit, vendimi unifikues nuk sjell ndryshim të ligjit në vetvete, por synon të korrigjojë mënyrën se si ai zbatohet nga gjykatat.
Ai u ndal te problematika e numrit të lartë të të paraburgosurve në vend, duke theksuar se kjo ka qenë një shqetësim edhe në raportet ndërkombëtare.
“Ishte më shumë presion ndërkombëtar, sepse kemi parasysh Këshillin e Europës edhe në kuadrin e monitorimit që i bëri vendit për të hyrë në BE. Ishte një nonsens që të kesh më shumë të paraburgosur se të burgosur. Shifrat arritën në të tilla, 60 për qind. Me këtë vendim unifikues, tashmë unë nuk vlerësoj që ndryshoi ligji, pasi ka qenë dhe është i mirë dhe i saktë, por problemi është i qasjes. Pra, unifikimi rregullon qasjen e gjykatës; ju jeni ata që ishit, por tani do ta bëni të zakonshme atë që e kishit bërë të jashtëzakonshme”, tha ai.
